Հայաստանում գտնվող Ռուսաստանի ռազմակայանում մեկնարկել են տանկային անձնակազմերի վարժանքները

ԵՐԵՎԱՆ, 20 հուլիսի– Sputnik. Հայաստանում գտնվող Հարավային ռազմական օկրուգի (ՀՌՕ) ռուսական ռազմակայանում մեկնարկել են Տ–72Բ տիպի տանկերի անձնակազմերի վարժանքները, որոնք անցկացվում են ծովի մակերևույթից ավելի քան 2 հազար մետր բարձրության վրա, երկուշաբթի ՌԻԱ Նովոստիին տեղեկացրել է օկրուգի մամուլի ծառայությունը։

«Մեկ ամիս տևող վարժանքներին մասնակցում են զորամասի ավելի քան 100 տանկիստ զինծառայողներ, որոնց թվում են` վարորդ–մեխանիկներ, նշանառու–օպերատորներ և մեքենաների հրամանատարներ», – նշվում է հաղորդագրության մեջ։

Մամուլի ծառայությունը տեղեկացրել է, որ վարժանքների ընթացքում զինծառայողները կմշակեն շոգ եղանակին բարձր լեռնային պայմաններում տանկերն էքստրեմալ վարելու և գիշերն ու ցերեկը կրակային պատրաստվածության հատուկ հմտություններ։

Նշվում է, որ մինչև 10 կմ հեռավորություն ունեցող երթուղու դեպքում մեխանիկները կսովորեն հաղթահարել տարբեր բարդության խոչընդոտներ, ինչպես նաև հատված տեղանքով կիրականացնեն մանևրեր ծովի մակերևույթից մինչև 2,5 հազար մետր բարձրության վրա։

«Նորակոչիկներն առաջին անգամ կանցնեն հաստիքային զենքով գործնական հրաձգության դասընթացներ։ Տանկից նորակոչիկները կկրակեն Կալաշնիկովի գնդացիրներից և թնդանոթներից տեղից ու շարժման ժամանակ 500–2000 մետր հեռավորության վրա գտնվող տարբեր թիրախների ուղղությամբ։ Հրաձգության ընթացքում տանկիստները կկատարեն ռազմամթերքի բեռնման նորմատիվներ», – նշվում է հաղորդագրության մեջ։

Մամուլի հադորդագրության մեջ նաև նշվում է, որ վարժանքների վերջում տանկիստները տանկակայանում կհանձնեն խոչընդոտների և արագընթաց հրաձգության հաղթահարման ստուգարքային վարժություններ, ֆիզիկական պատրաստվածության և տանկի ու հաստիքային սպառազինության բնութագրերի մարտավարական–տեխնիկական թեստավորման նորմատիվներ։