Ձմերուկի փառատոնը տեղի կունենա Երևանի Կարապի լճում շաբաթ օրը

ԵՐԵՎԱՆ, հուլիսի 18– Sputnik. Հուլիսի 18-ին Կարապի լճի հարակից տարածքում «Երևանյան ամառ 2015» ծրագրի շրջանակում կմեկնարկի ավանդական դարձած ձմերուկի ամենամյա փառատոնը, հաղորդում է քաղաքապետարանի մամուլի ծառայությունը:

Արդեն երրորդ տարին անընդմեջ անցկացվող փառատոնը համախմբում է ոչ միայն ձմերուկի սիրահար երևանցիներին ու մայրաքաղաքի հյուրերին, այլև ուրախ խաղերի և տարաբնույթ մրցույթների սիրահարներին

Փառատոնի շրջանակում կազմակերպված համերգին ելույթ կունենան հայկական շոու բիզնեսի ներկայացուցիչները, ովքեր, ելույթներից զատ, տոնախմբության մասնակիցներին ձմերուկ կհյուրասիրեն:

Այս տարի նույնպես սպասարկման ոլորտի տարբեր ընկերություններ կներկայացնեն ձմերուկի ձևավորման իրենց ինքնատիպ տարբերակները:

Երևանի քաղաքապետարանը փառատոնի կազմակերպման աջակից ընկերությունների հետ մրցանակներ և նվերներ է պատրաստել ակտիվ, ինչպես նաև ինքնատիպ մասնակիցների համար:

Նվերներ կստանան նաև փառատոնին ամենամեծ և ամենափոքր ձմերուկները ներկայացրած մասնակիցները:

Անցած տարի Ձմերուկի փառատոնը տեղի է ունեցել Երևանում հուլիսի 11–ին։