ԵՐԵՎԱՆ, հուլիսի 18– Sputnik. 18-ամյա հեծանվորդ Էդգար Ստեփանյանը Հայաստանի հեծանվային սպորտի պատմության մեջ առաջին անգամ շահել է Եվրոպայի առաջնության ոսկե մեդալ, գրել է Հայաստանի հեծանվային մարզաձևի ֆեդերացիայի նախագահ Արման Սահակյանը Facebook-ի իր էջում։
Նրա խոսքով` հուլիսի 14-19-ը Հունաստանի մայրաքաղաք Աթենքում ընթացող հրապարակային հեծանվավազքի Եվրոպայի երիտասարդական առաջնությունում «Սկրատչ» մրցաձևում (10 կմ խմբակային մրցավազք) Ստեփանյանը նվաճել է Եվրոպայի չեմպիոնի կոչումը։
«Հայկական սպորտի պատմության մեջ նոր էջ է գրվել»,– նշել է ֆեդերացիայի նախագահը։
Սահակյանը նշել է, որ Հայաստանի հավաքականի գլխավոր մարզիչ Արմեն Գյոզալյանի գլխավորությամբ Հայաստանի թիմը փայլուն աշխատանք է կատարել Ծաղկաձորում կազմակերպված ուսումնամարզական հավաքի ընթացքում ու կարճ ժամանակում այն արդյունք է տվել:
«Նշեմ նաև մեր հավաքականի մեխանիկ Արսեն Բորյանի գրագետ աշխատանքը»,– ասել է ֆեդերացիայի նախագահը:
