ԵՐԵՎԱՆ, հուլիսի 17– Sputnik. GAIA զոնդն օգնել է աստղագետներին գտնել յուրահատուկ աստղային համակարգ, որը կազմված է երկու մահացած լուսատուներից` վառ սպիտակ գաճաճ «վամպիրից» և խամրած հելիումային հսկայից, որը պարբերաբար ստվերապատում է իրեն խժռող ընկերոջը, հաղորդում է ՌԻԱ Նովոստին` հղում անելով Թագավորական աստղագիտական միությանը։
«Դա հիանալի աստղային համակարգ է. այն պատկանում է շատ հազվագյուտ կրկնակի աստղերի ենթատեսակի, որի բնակիչները պտտվում են միմյանց շուրջ մեկ ժամից արագ, և որտեղ նրանք այնպես են դասավորված, որ մեկ լուսատուն լիովին փակում է երկրորդին։ Դրա շնորհիվ մենք կարողացել ենք չափել նրանց զանգվածները և չափսերն այնքան ստույգ, ինչպես մեզ երբեք չի հաջողվել անել»,– պատմել է Թոմաս Մարշը Ուորիքի համալսարանից։
Մարշը և նրա գործընկերները պատահմամբ են կատարել այդ հայտնագործությունը, ինչպես խոստովանում են գիտնականները. GAIA–ի լուսանկարներում անսովոր աստղը նկատել են ոչ թե նրանք, այլ սիրողական աստղագետները` նկատելով անսովոր «փայլատակող» աստղը Վիշապի համաստեղությունում։
Ի սկզբանե հոդվածի հեղինակները Gaia14aae աստղային համակարգը սովորական օբյեկտ են համարել` սպիտակ գաճաճ «վամպիրի» և սովորական աստղի զույգ, որի շնորհիվ այն պարբերաբար պայթում է` առաջացնելով վառ բռնկում։
Սիրողական աստղագետների դիտումները ստիպել են Մարշին կասկածել դրանում և լրացուցիչ հետազոտություններ անցկացնել, որոնց ընթացքում նրա թիմը պարզել է, որ այդ լուսատուները պատկանում են կրկնակի աստղերի շատ հազվագյուտ դասի, որոնց ընդհանուր թիվը մեր գլակտիկայում չի անցնում քառասունից։
Աստղագետները գտել են «վամպիր» աստղ, որը «պահմտոցի» է խաղում զոհի հետ
© Sputnik / Юрий Простяков
/ Բաժանորդագրվել
Աստղագետները հայտնաբերել են հազվագյուտ աստղային համակարգ, որտեղ գտնվում է «վամպիր» աստղ և նրա զառամյալ զոհը` ամբողջությամբ զրկված ջրածնից, GAIA եվրոպական աստղադիտակով ստացված լուսանկարներում։
