ՌԴ առևտրային ներկայացուցիչ. Հայաստանը կարող է բացառիկ ապրանք մշակել

ԵՐԵՎԱՆ, 17 հուլիսի — Sputnik. Ռուսական բիզնեսն այժմ մեծապես հետաքրքրված է Հայաստանով, գործարար հանդիպումների անցկացման տարբեր պատվիրակությունները բառացիորեն մեկը մյուսի հետևից Ռուսաստանից Հայաստան են ժամանում, ասել է Հայաստանում ՌԴ առևտրային ներկայացուցիչ Անդրեյ Բաբկոն «Դելովոյ էքսպրես» թերթին տված հարցազրույցում։

Ըստ նրա` ժամանակին Հայաստանը ԽՍՀՄ–ում առաջատար էր մի շարք ուղղություններով` առաջին համակարգիչը հավաքվել է այստեղ, հայկական կոշկի մասին գիտեին ամբողջ երկրում և այլն, այսօր Հայաստանին ոչինչ չի խանգարում բացառիկ ապրանք մշակելու համար։

«Ահա մի հիանալի օրինակ` սկսել են արտադրել ArmTab հայկական պլանշետներ։ Այո, քիչ քանակությամբ, բայց դպրոցները կապահովվեն դրանցով։ Իսկ դա դեռ առանց ռուսական մասնակցության։ Կամ, օրինակ, առայժմ բացարձակապես չի գործարկվել «Ալյանս» հատուկ տնտեսական գոտին։ Այնպես որ հեռանկարներ կան, և փոքր չեն, պարզապես պետք է ավելի խորը փորել»,– նշում է ՌԴ առևտրային ներկայացուցիչը։

Բաբկոն հայտնել է, որ ներկայում տարվում են ռուս–հայկական համատեղ նախագծերի վերաբերող կոնկրետ բանակցություններ։ Մասնավորապես, տարվում է Հայաստանում ռուսական արտադրության ջերմոցների կառուցման և առաջխաղացման ակտիվ աշխատանք, որոնք գներով ավելի մրցակցային կլինեն, քան հոլանդականները, իսկ որակով` գրեթե նույնը։

«Դա իրական նախագիծ է, որին օժանդակում են Հայաստանի մի շարք նախարարություններ` գյուղատնտեսության, էկոնոմիկայի։ Եվ ամենակարևորը` մենք այստեղ ընդգրկում ենք ռուսական բանկերի վարկաֆինանսական գծի օգտագործման հնարավորությունը, որը թույլ է տալիս արտահանողին այստեղ սարքավորումներ մատակարարել»,– պարբերականը մեջբերում է Հայաստանում Ռուսաստանի առևտրային ներկայացուցչի խոսքը։