Պաղեստինցի աղջիկն արտասվել է Մերկելի հայտարարությունից

ԵՐԵՎԱՆ, հուլիսի 17– Sputnik. Ռեեմ անունով աղջիկը պատմել է Մերկելին այն բարդ իրավիճակի մասին, որում հայտնվել է իր ընտանիքը, ապագայի նկատմամբ մշտական վախի, Գերմանիայում ապաստան ստանալու հարցում մերժման մասին` ասելով, որ իրենք ծանր ժամանակներ են ապրել, և քիչ է մնացել նրանց վտարեն։  Աղջիկն ասել է նաև, որ կցանկանար սովորել ԳԴՀ–ում։

Կանցլերը պատասխանել է, որ հասկանում է իրավիճակը, կարեկցել է աղջկան և շոյել նրա գլուխը, բայց նշել է, որ Գերմանիան չի կարող ընդունել բոլոր ցանկացողներին, որովհետև երկիրը պարզապես չի կարողանա դա կառավարել։ Դրանից հետո դպրոցականն արտասվել է։

Կանցլերը նշել է նաև, որ շատերը ստիպված կլինեն ետ վերադառնալ։

2015թ.–ին Գերմանիայում փախստականների թիվն ավելացել է ավելի քան երկու անգամ` անցյալ տարվա համեմատ։ Միգրացիայի և փախստականների գործերով դաշնային գերատեսչության տվյալներով` 2015 թվականի հունվարից մայիս ապաստան է խնդրել 141 905 մարդ, այդ թվում տրվել է 125 972 նոր և 15 933 կրկնակի հայտ։ Նախորդ տարվա նույն ժամանակահատվածում հունվարից մայիս ԳԴՀ–ում ապաստան ստանալու հայտ է ներկայացրել 62 602 մարդ։