Աթենքում ցուցարարները ոստիկանների ուղղությամբ «Մոլոտովի կոկտեյլներ են» նետել

Հունաստանի ոստիկանությունն ավելի քան 50 մարդ է ձերբակալել խորհրդարանի շենքի մոտ տեղի ունեցած անկարգությունների ժամանակ։ Մինչ այդ խորհրդարանի պատգամավորները քննարկում էին խնայողությունների նոր միջոցների ներդրման հարցը, որոնք թույլ կտա Աթենքին նոր օգնություն ստանալ եվրոպացի վարկատուներից։ Տնտեսական քաղաքականության խստացման դեմ բողոքի մասնակիցները ոստիկանների ուղղությամբ նետում էին հրկիզվող խառնուրդ պարունակող շշեր։ Դրան ի պատասխան` ոստիկանները կիրառել են արցունքաբեր գազ, հաղորդում է Skai հեռուստաալիքը։

Չորեքշաբթի լույս հինգշաբթի գիշերը խորհրդարանում կայացած քվեարկության ժամանակ պատգամավորների մեծամասնությունն աջակցել է «Շտապ միջոցներ բանակցությունների անցկացման և Աջակցության եվրոպական մեխանիզմի (ESM) հետ համաձայնության ձեռքբերման համար» օրինագծին։ 300 տեղանոց խորհրդարանում «կողմ է» քվեարկել 229 պատգամավոր, դեմ` 64–ը, ձեռնպահ է մնացել 6 պատգամավոր։

Օրինագիծը հասարակության շրջանում արժանացել է կոշտ քննադատության ։ Այս օրինագծով նախատեսված ԱԱՀ–ի բարձրացումը կհանգեցնի սննդամթերքի, վառելիքի և տարբեր ծառայությունների գների աճին։ Միաժամանակ սպասվում են աշխատվարձերի և կենսաթոշակների հերթական կրճատումներ։