Moody’s. ՌԴ–ում ռեցեսիան բացասաբար կազդի Հայաստանի և ԱՊՀ բանկերի վրա

ԵՐԵՎԱՆ, հուլիսի 15– Sputnik. Ռուսաստանում ռեցեսիան և նավթի համաշխարհային գների անկումը 2015-2016թթ.  բացասաբար կազդեն Հայաստանի և ԱՊՀ այլ երկրների բանկերի վրա, նշվում է Moody’s Investors Service վարկանիշային գործակալության պաշտոնական կայքում` հղում անելով «Banks in CIS feel pinch from Russia downturn and low oil prices» հաշվետվությանը։

«Մենք կանխատեսում ենք, որ Ռուսաստանում ռեցեսիան և նավթի գների անկումը բացասական ազդեցություն կունենան ԱՊՀ երկրների բանկերի վրա` տեղական արժույթները ճնշելու միջոցով, Ռուսաստանում աշխատող ԱՊՀ երկրների քաղաքացիներից դրամական փոխանցումների ծավալի կրճատման և ԱՊՀ երկրներից Ռուսաստան արտահանման կրճատման վրա»,– ասում է Moody’s–ի վերլուծաբան Լև Դորֆը։

Բանկերի վրա բացասական ազդեցությունը հիմնականում պայմանավորված է ԱՊՀ երկրների մեծամասնությունում տեղական արժույթների թուլացմամբ։ Ինչպես հաստատում է վարկանիշային գործակալությունը, արժեզրկման հետ կապված հիմնական խնդիրն արտարժույթով վարկերի բարձր մակարդակն է` տրված փոխառուներին, որոնք մեծամասամբ չունեն արժութային եկամուտներ։

«Հայաստանում բացասական ազդեցությունը չափավոր կլինի` հաշվի առնելով դրամի արժեզրկման համեմատաբար ոչ բարձր աստիճանը։ Սակայն Հայաստանի բանկային հատվածը, որը բնորոշվում է դոլարացման բարձր աստիճանով, կբախվի ակտիվների որակի վրա ճնշման ուժեղացման հետ ազգային արժույթի հետագա արժեզրկման դեպքում»,– նշում է վարկանիշային գործակալությունը։

Moody’s–ի կարծիքով` արժեզրկման հետ կապված անբարենպաստ գործոններն առավել սուր կազդեն Բելառուսի, Տաջիկստանի և Ադրբեջանի բանկերի վրա, ընդ որում նրանք, հավանաբար, համեմատար չափավոր կլինեն Ուզբեկստանում, որտեղ գոյություն ունի խիստ արժութային հսկողություն, որի դեպքում ԱՄՆ դոլարի նկատմամբ արժեզրկումը տեղի է ունենում աստիճանաբար։

Moody’s–ը կանխատեսում է այս տարի Ռուսաստանի ՀՆԱ նվազում 3 տոկոսով և զրոյական աճ 2016թ.–ին` ելնելով 2015թ.–ին Brent տեսակի նավթի մեկ բարելի դիմաց 60 դոլար և գալիք տարի մեկ բարելի դիմաց 65 դոլար կանխատեսվող գներից։