Փորձագետ. Հայաստանը պետք է դիվերսիֆիկացնի տրանսպորտային ենթակառուցվածքները

ԵՐԵՎԱՆ, 10 հուլիսի– Sputnik. Հայաստանի համար շատ կարևոր է տրանսպորտային ենթակառուցվածքների դիվերսիֆիկացումը, Sputnik Արմենիա ռադիոկայանին տված հարցազրույցում  ասել է ԱՊՀ երկրների ինստիտուտի հայկական մասնաճյուղի տնօրեն, քաղաքագետ Ալեքսանդր Մարկարովը։

Մեկնաբանելով Ուֆայում Հայաստանի նախագահ Սերժ Սարգսյանի ելույթը, նա նշել է, որ Իրան–Հայաստան երկաթգծի շինարարությունը կարող է հետաքրքրել նաև այլ խաղացողների, որոնք ներգրավված են տարածաշրջանային ինտեգրման գործընթացում։

Նախօրեին նախագահ Սարգսյանը` Ուֆայում ԲՌԻԿՍ, ԵՏՄ և ՇՀԿ համատեղ գագաթնաժողովին ելույթ ունենալիս, հայտարարել է, որ հայ–իրանական երկաթգծի շինարարության ծրագիրը կապահովի ԵՏՄ երկրների ելքը` Պարսից ծոցով դեպի Հնդկական օվկիանոս։

Երկրի ղեկավարի խոսքերով` արդեն իսկ նախապատրասված է տեխնիկա–տնտեսական հիմնավորումը, և ծրագիրը բաց է պետական մասնավոր համագործակցության համար։ Նա հույս է հայտնել, որ գագաթնաժողովին ներկա եղած երկրների կազմակերպությունները հետաքրքրություն կհայտնեն այդ նախաձեռնության հանդեպ։

«Պատահական չէ, որ այդ ծրագրի շուրջ մի շարք հանդիպումներ են տեղի ունեցել։ Երկաթգծի շինարարությունը բարդ տեխնիկական խնդիր է, որը երկար ժամանակ լուծում չէր ստանում։ Եվ այն մինչև հիմա գտնվում է նախագծային փուլում։ Նախագահի արած առաջարկը, հավանաբար, ուղղված է շահագրգիռ կողմերին` նպատակ ունենալով ներգրավել նրանց այդ գործընթացում», – հայտնել է Մարկարովը։

Փորձագետը ընդգծել է, որ հիմնական հարցն այն է` ով կհետաքրքրվի դրա իրականացման մեջ։ «Մասնավորապես, խոսքը ԻԻՀ–ի մասին է։ Չնայած այն բանին, որ իրանական կողմը ծրագրի մասնակցելու պատրաստակամություն է հայտնել, հարց է առաջանում. ինչ միջոցներ է նա պատրաստ տրամադրել», – ասել է Մարկարովը։

Հայաստանի կառավարությունը 2014 թվականի օգոստոսի 7-ին հավանություն է տվել Իրան–Հայաստանի երկաթգծի կառուցման նախնական ծրագրին։

Ծրագրի արժեքը գնահատվում է 3.5 մլրդ դոլար, երկաթգծի երկայնությունը կազմում է 300 կմ, նրա ենթակառուցվածքի մեջ կմտնեն 64 կամուրջներ 19.4 կմ ընդհանուր երկարությամբ, 60 թունել 102.3 կմ երկայնությամբ և 27 կայան։

Շինարարությունը նախատեսվում է ավարտել 2022 թվականին, բեռնափոխադրումների ծավալը կկազմի 25 մլն տոննա` տարեկան։

Երկաթգծի նախագիծը մշակել է Չինաստանի հաղորդակցության և շինարարության միջազգային կազմակերպությունը (CCCC International)։Ծրագրով հետաքրքրված են չինական բանկերը, որոնք պատրաստակամություն են հայտնել ֆինանսավորել ծրագրի 60 տոկոսը։