Երևանում հերթական ցույցը տեղի կունենա հաջորդ շաբաթվա վերջին

ԵՐԵՎԱՆ, հուլիսի 9–Sputnik. Երևանում էլեկտրաէներգիայի թանկացման դեմ հերթական ցույցը տեղի կունենա հաջորդ շաբաթվա վերջին, հայտարարեց համակարգող խմբի անդամ Նարեկ Այվազյանը։

«Հանրահավաքի անցկացման կոնկրետ օրվա մասին մենք լրացուցիչ կհաղորդենք ԶԼՄ–ների և սոցիալական ցանցերի միջոցով»,– հինգշաբթի ասաց  նա բողոքի ակցիայում։

Շարժման կազմակերպիչներից մեկը` Դավիթ Սանասարյանը, ով ավելի վաղ հացադուլ էր հայտարարել, հաղորդել է, որ դադարեցնում է այն` ազդարարելով ցույցի ավարտի մասին։

Երևանի Ազատության հրապարակում հավաքվել է շուրջ հարյուր մարդ, որտեղ ընթանում է «Լուսավորիչ հանրահավաք»։ Ցուցարարների մի մասը որոշակի ակտիվություն է ցուցաբերել` աջակցելով ակտիվիստներին հավանության գոչերով, մյուսներն իրենց ավելի պասիվ են պահել։

Ակտիվիստները կոչ են արել հանրահավաքի մասնակիցներին պայքարել Հայաստանի իշխանությունների դեմ։ Ավելի վաղ ցուցարարները հանդես չեն եկել քաղաքական հայտարարություններով, հայտարարելով, որ նրանց պահանջները կրում են բացառապես սոցիալական բնույթ։

Հունիսի կեսին Հայաստանի հանրային ծառայությունները կարգավորող հանձնաժողովը որոշում ընդունեց 16 տոկոսով բարձրացնել էլեկտրաէներգիայի սակագինը, ընդ որում «Հայաստանի էլեկտրական ցանցեր» ընկերությունն իր հայտում մտադիր էր սակագինը բարձրացնել 40,8 տոկոսով։ Այս ամենը հանգեցրեց բողոքի ակցիայի, որը սկսվեց Երևանում հունիսի 19–ին և հունիսի 22–ին վերածվեց քայլերթի դեպի նախագահի նստավայր` Մարշալ Բաղրամյան պողոտա։