Հուշարձանների պահպանական գոտիների բացակայությունը լուրջ խոչընդոտ է հուշարձանի պահպանության գործում

ԵՐԵՎԱՆ, 1 հուլիսի – Sputnik. Հուշարձանների պահպանական գոտիների բացակայությունը լուրջ խոչընդոտ և գերխնդիր է հուշարձանի պահպանության գործում, նշվում է «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի առաջին կիսամյակի աշխատանքների հաշվետվությունում, հայտնում է ՊՈԱԿ–ի պաշտոնական կայքը։

Ըստ հաղորդագրության` նախօրեին ամփոփվել են «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի ՊՄՊ` Լոռու, Տավուշի, Վայոց ձորի, Շիրակի, Սյունիքի, Արմավիրի մարզային ծառայությունների, «Գլաձորի համալսարան» պատմամշակութային արգելոց-թանգարանի, «Արփի» բնապատմական արգելոցի, «Զվարթնոց» պատմամշակութային արգելոց-թանգարանի, «Զորաց քարեր» բնակատեղի» պատմամշակութային արգելոցի ընթացիկ տարված առաջին կիսամյակի աշխատանքները:

Մարզային ծառայությունների պետերն ու մասնաճյուղերի վարիչների զեկուցումներում առանձնացվել է վտանգված հուշարձանների խնդիրը, նշվել, որ վեց ամիսների ընթացքում դրանց թիվն ավելացել է: Միաժամանակ, արգելոցների ու արգելոց թանգարանների վարիչներն առանձնացրել են շենքային պայմանների խնդիրները` միաժամանակ նշելով, որ դրանք խոչընդոտ չեն եղել բազմաթիվ միջոցառումների կազմակերպման համար:

«Որոշ արգելոց թանգարաններ այս տարվա վեց ամիսների ընթացքում ավելի շատ այցելուներ են ունեցել, քան նախորդ տարվա նույն ժամանակահատվածում»,– ասված է հաղորդագրությունում։

Կոտայքի, Գեղարքունիքի, Արագածոտնի, Արարատի, Երևանի ՊՄՊ մարզային ծառայությունների և «Լոռի Բերդ» քաղաքատեղի պ/մ արգելոցի, «Գոշավանք» պատմաճարտարապետական արգելոցի և «Դիլիջան» ժողովրդական ճարտարապետության արգելոց-թանգարանի աշխատանքները կամփոփվեն հուլիսի 9–ին։