Ռոստոմյան. հայ մարզիկների մասնակցությունը Բաքվի Եվրախաղերին հերոսություն էր

ԵՐԵՎԱՆ, 7 հուլիսի — Sputnik. Եվրոպական խաղերին հայկական պատվիրակության մասնակցությունը հերոսական քայլ էր, երեքշաբթի լրագրողներին հայտնեց պատվիրակության ղեկավար, Ազգային օլիմպիական կոմիտեի գլխավոր քարտուղար Հրաչյա Ռոստոմյանը։

Նրա խոսքով` տասնյակ հազարավոր ադրբեջանցիների միջով անցնելը Եվրոպական խաղերի բացման ժամանակ ամենահաճելի զգացումը չէր, բայց դա պետք էր անել հանուն Հայաստանի պատվի։

«Հենց այդ քայլը մի քանի անգամ բարձրացրեց մեր հեղինակությունը եվրոպական և օլիմպիական ընտանիքի աչքում։ Այսօրվանից մենք ունենք բազմաթիվ նոր ծրագրեր։ Եվ եթե չմեկնեինք Բաքու, ապա մեծ մինուս կլիներ, քան հակառակը»,– ասաց Ռոստոմյանը։

«Բոլորին հասկանալի է, որ Բաքու մեկնել ոչ ոք չէր ցանկանում։ Սակայն մենք բազմաթիվ պայմանավորվածություններ և համաձայնագրեր ունենք միջազգային սպորտային տարբեր կառույցների հետ, ինչը մեզ պարտավորեցնում էր մասնակցել խաղերին»,– ավելացրեց Ռոստոմյանը։

Հավաքականի մամուլի քարտուղար, Հայաստանի հանրային հեռուստաընկերության մարզական մեկնաբան Կարեն Գիլոյանն իր հերթին նշեց, որ առաջին օրից հայկական պատվիրակությունը Բաքու է մեկնել առանց վախի և հաղթելու նպատակով։

«Հուզվել էին միայն երկու մարզիկներ և այն պարզ պատճառով, որ լարված իրավիճակ էր և հաղթելու հսկայական ցանկություն։ Միաժամանակ մեր մարզիկներն ուշադրություն չեն դարձրել սուլոցներին, լավ են ելույթ ունեցել` պաշտպանելով երկրի մարզական պատիվը»,– նշեց Գիլոյանը։

Բաքվում Առաջին եվրոպական խաղերի մասնակցության հարցի ֆինանսական մասն իր վրա է վերցրել ԱՕԿ նախագահ Գագիկ Ծառուկյանը, չնայած, որ Ադրբեջանը նախապես առաջարկել է վճարել բոլոր ծախսերը։

Եվրոպական առաջին խաղերն ավարտվել են հունիսի 28–ին։ Ընդհանուր ստուգարքով հաղթող է դարձել Ռուսաստանի հավաքականը` նվաճելով 164 մեդալ (79 ոսկե, 40 արծաթե և 45 բրոնզե)։ 

Հայկական հավաքականին միակ արծաթե մեդալ է բերել հունահռոմեական ոճի ըմբիշ Միհրան Հարությունյանը (66 կգ)։