Ադրբեջանի ԱԳՆ–ն Լյուբով Կազարնովսկայային կընդգրկի անցանկալի անձանց ցուցակում

ԵՐԵՎԱՆ, 6 հուլիսի – Sputnik. Ռուս օպերային երգչուհի Լյուբով Կազարնովսկայայի անունը, որն այցելել է Ղարաբաղ, կընդգրկվի Ադրբեջանի ԱԳՆ–ի անցանկալի անձանց ցուցակում, հայտնում է ՌԻԱ Նովոստին` հղում անելով արտաքին քաղաքական գերատեսչության մամուլի ծառայության ղեկավար Հիկմետ Գաջիևին։

Ավելի վաղ օպերային երգչուհի և մանկավարժ Կազարնովսկայան այցելել է Ստեփանակերտ, որտեղ երաժշտական քոլեջում վարպետության դասեր է անցկացրել։ Հայաստանի ԶԼՄ–ների հաղորդմամբ, սա երգչուհու` Լեռնային Ղարաբաղ առաջին այցը չէր։

Օտարերկրացիների` որոնց մուտքն Ադրբեջան արգելված է, սև ցուցակում ընդգրկված են մարդիկ, ովքեր չեն համաձայնեցրել իրենց այցը Ադրբեջանի իշխանությունների հետ այն հանրապետության տարածք, որը, ինչպես կարծում են Բաքվում, գտնվում է Հայաստանի օկուպացիայի տակ, այդ թվում` Լեռնային Ղարաբաղը։ Այս ցուցակը հրապարակվել է Ադրբեջանի ԱԳՆ–ն կողմից 2013 թվականին։ Ցուցակում ընդգրկված են ավելի քան  300 մարդ։

«Ռուս օպերային երգչուհի Լյուբով Կազառնովսկայան` «Ադրբեջանի պետական տարածքի մասին» օրենքը խախտելով, անօրինական այց է կատարել Լեռնային Ղարաբաղի չճանաչված տարածք, այս կապակցությամբ, համաձայն համընդհանուր ընթացակարգի նրա անունը կընդգրկվի անցանկալի մարդկանց ցուցակում», – ասել է Գաջիևը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: