ԻՆՏԵՐ ՌԱՕ–ն և Հայաստանի իշխանությունները միասին աուդիտոր կընտրեն Էլցանցերի համար

ԵՐԵՎԱՆ, 6 հուլիսի–Sputnik. «Ինտեր ՌԱՕ»–ն Հայաստանի իշխանույթունների հետ համատեղ մրցութային կարգով կընտրեն կազմակերպություն, որը աուդիտ կիրականացնի «Հայաստանի էլեկտրացանցեր»–ում (ՀԷՑ, «Ինտեր ՌԱՕ» դուստր ձեռնարկություն), հայտնել է ռուսական էլեկտրահոլդինգի ղեկավար Բորիս Կովալչուկը։

«Կանցկացվի մրցույթ և «մեծ քառյակից» միջազգային ճանաչում ունեցող կազմակերպություններ կընտրվեն։ Սա մեր` Հայաստանի իշխանությունների հետ համատեղ որոշումն է։ Ընտրված կազմակերպություններն անկախ աուդիտ կիրականացնեն, որը մենք միայն ողջունում ենք», – ասել է նա, հայտնում է ՌԻԱ Նովոստին։

Աուդիտը, Կովալչուկի խոսքերով, կարող է տևել մոտ 3 ամիս։ Հետագայում կազմակերպությունը չի բացառում ակտիվները վաճառելու հնարավոր տարբերակը։ «Մենք պատրաստ ենք վաճառել ցանկացած ակտիվ, եթե լավ գումար առաջարկեն, ինչպես նաև պատրաստ ենք գնելու ցանկացած ակտիվ, եթե գինը մեզ հարմար լինի։ Ցանկացած տարբերակ հնարավոր է», – պարզաբանել է նա։

Հունիսին Հայաստանի հանրային ծառայությունները կարգավորող հանձնաժողովը որոշում ընդունեց 16 տոկոսով բարձրացնել էլեկտրաէներգիայի սակագինը, ընդ որում «Հայաստանի էլեկտրական ցանցեր» ընկերությունն իր հայտում մտադիր էր սակագինը բարձրացնել 40,8 տոկոսով։ Այս ամենը հանգեցրեց բողոքի ակցիայի, որը սկսվեց Երևանում հունիսի 19–ին և հունիսի 22–ին վերածվեց քայլերթի դեպի նախագահի նստավայր` Մարշալ Բաղրամյան պողոտա։

Ավելի ուշ հայկական իշխանություններն առաջարկեցին իրականացնել «Հայաստանի էլեկտրական ցանցեր» ընկերության աուդիտ, իսկ այդ ժամանակահատվածում իշխանությունները կսուբսիդավորեն բարձրացված սակագները։

Ավելի վաղ «Կոմերսանտ» թերթը հայտնել էր, որ «Ինտեր ՌԱՕ»–ն բանակցություններ է վարում ՀԷՑ–ը վաճառելու վերաբերյալ։ Իր հերթին` էներգահոլդինգը հերքել է տեղեկությունն այն մասին, որ կազմակերպությունը մասնակցում է բանակցությունների և նախապատրաստել է «Էլցանցների» վաճառքի գործարքը։