Գլումով. Ռուսաստանը պետք է ապահովի իր ազդեցությունը հայ երիտասարդների շրջանում

ԵՐԵՎԱՆ, 3 հուլիսի– Sputnik. Ռուսաստանը պետք է լրջորեն մտածի այն հարցի շուրջ, թե ինչպես պետք է ապահովի իր ազդեցությունը հայերի նոր սերնդի շրջանում, ասաց հայտնի ռադիոհաղորդավար Եգոր Գլումովը ուրբաթ ռուս և հայ լրագրողների հետ հանդիպման ժամանակ։

«Եթե Ռուսաստանին պետք է մնալ Հայաստանում, ապա նա պետք է նվաճի այս սերնդի սերը», – ասաց ռադիոհաղորդավարը «Ժամանակակից լրագրող. սոցիալական պատասխանատվություն և պրոֆեսիոնալ հաջողության բաղադրիչներ»  թեմայով կլոր սեղանի ընթացքում։

Նրա խոսքով` դեռևս խորհրդային տարիներից հայերի համար շատ կարևոր էր, օրինակ, խորհրդային ֆիլմերի տիտրերում տեսնել իրենց հայրենակիցների ազգանունները, հենց այդ պատճառով հիմա նրանց համար հեղինակության հարց է այն, որ ռուսական լուրերում խոսվում է հայերի ձեռքբերումների մասին, օրինակ` գիտության կամ սպորտի ոլորտում։

«Նման պահանջներ չկան Ինդոնեզիայի կամ Անգոլայի հեռուստատեսության նկատմամբ, քանի որ դրանք ամբողջովին այլ երկրներ են, իսկ Ռուսաստանը մերն է։ Ես հստակ գիտակցում եմ, որ Ռուսաստանը պարտավոր չէ դա անել, սակայն դա նրա խնդիրն է, դրանից հայերի հպարտությունը չի տուժում։ Ռուսաստանն այսօր իսկապես կորցնում է Հայաստանին։ Միգուցե առաջին դեմքերի մակարդակում ամեն ինչ լավ է, սակայն մեր երիտասարդության մակարդակում այլևս այդպես չէ», – նշեց Գլումովը։

Նրա խոսքով` հայերի` այսօրվա երիտասարդ սերունդը ռուսական ԶԼՄ–ների փոխարեն նախընտրում է արևտմյան ԶԼՄ–ները` BBC–ին և CNN–ը։

«Ռուսաստանը կորցրեց Վրաստանը, Ուկրաինան և դժվար թե նրանց վերադարձնի, իսկ Հայաստանը, ցավոք, նրան հետաքրքրում է միայն այն տեսակետից, թե, արդյո՞ք, այստեղ «մայդան է», թե՞ ոչ», – ասաց Գլումովը։

«Ժամանակակից լրագրող. սոցիալական պատասխանատվություն և պրոֆեսիոնալ հաջողության բաղադրիչներ»  թեմայով կլոր սեղանն անցկացվել է հուլիսի 3–ին Երևանում։ Քննարկման հիմնական թեմաներն էին իրադարձությունների պրոֆեսիոնալ լուսաբանումը` երևանյան բողոքի ցույցի օրինակով, ռուս–հայկական հարաբերությունների խնդիրներն ու Ռուսաստանի դերակատարությունը Հարավային Կովկասում։

Քննարկմանը մասնակցել են Ռուսաստանի հանրային հեռուստատեսության պատմական–հրապարակախոսական ծրագրերի տնօրինության տնօրեն Լեոնիդ Մլեչինը, «ՏՎՑ» հեռուստաալիքի «Ձայնի իրավունք» ծրագրի հաղորդավար Ռոման Բաբայանը, «RussiaToday» հեռուստաալիքի քաղաքական մեկնաբան Ալեքսանդր Գուրնովը, Հայաստանի հանրային հեռուստառադիոընկերության խորհրդի նախագահ Ռուբեն Ջաղինյանը, Հայաստանի կինեմատոգրաֆիստների միության նախագահ Ռուբեն Գևորգյանցը, լրագրողներ և հասարակական գործիչներ։