Տնտեսագետ. ՀԷՑ-ին՝ այլ ընկերությունների պարտքերը վկայում են կառավարման անարդյունավետության մասին

ԵՐԵՎԱՆ, 3 հուլիսի–Sputnik. ՀԷՑ-ին՝ այլ ընկերությունների կողմից ունեցած պարտքերը վկայում են, որ այնտեղ կառավարումն արդյունավետ չի եղել,

ինչը հերթական անգամ ապացուցում է, որ ՀԷՑ-ում կառավարումը, իսկապես, արդյունավետ չի եղել, և ՀԷՑ-ի ղեկավարությունը չի կարողացել ճշգրտորեն կարգավորել և տնօրինել սեփական ֆինանսները, «Sputnik-Արմենիա» ռադիոկայանի հետ զրույցում նշել է տնտեսագետ Վահագն Խաչատրյանը։

«Սովորական սպառողը պարտավոր է մինչև հաջորդ ամսի 20-ը վճարել մատուցած ծառայությունների դիմաց: ՀԷՑ-ի ներկայացրած հաշվետվությունները վկայում են, որ ազգաբնակչությունը կատարում է վճարումները 99.9 տոկոսով: Ինչ վերաբերում է պարտքեր կուտակած ընկերություններին, ապա ինչո՞ւ է ՀԷՑ-ը հիմա դիմում դատարան, ինչո՞ւ երեկ կամ առաջին օրը, կամ մեկ ամիս, մեկ տարի, չորս տարի առաջ չէր դիմում: ՀԷՑ-ը թող պաշտպաներ օրենքով սահմանված իրավունքները, այսինքն՝ կա պայմանագիր, որի պարտավորությունները չեն կատարվել, ուրեմն՝ ընկերությունը պետք է դադարեցներ էլեկտրաէներգիայի մատակարարումը»,-ընդգծել է տնտեսագետը:

Նրա կարծիքով` ընկերությունը պարտավոր էր հետաքրքրվել իր մատուցած ծառայությունների դիմաց վճարումներով։

«Ընկերությունը հիմա որոշել է, ամենայն հավանականությամբ, ցույց տալ, թե տեսեք Հայաստանում կան ընկերություններ, որոնք չեն վճարել էլեկտրաէներգիայի դիմաց։ Իսկ դրանով փորձել հիմավորել, որ թանկացման պատճառ դա է, այդ փաստը որպես հիմնավորում օգտագործել՝ անընդունելի է, ավելին՝ այն նաև մասնագիտորեն է անընդունելի», — համոզմունք է հայտնել Վահագն Խաչատրյանը:

Հունիսի կեսին Հայաստանի հանրային ծառայությունները կարգավորող հանձնաժողովը որոշում ընդունեց 16 տոկոսով բարձրացնել էլեկտրաէներգիայի սակագինը, ընդ որում «Հայաստանի էլեկտրական ցանցեր» ընկերությունն իր հայտում մտադիր էր սակագինը բարձրացնել 40,8 տոկոսով։ Այս ամենը հանգեցրեց բողոքի ակցիայի, որը սկսվեց Երևանում հունիսի 19–ին և հունիսի 22–ին վերածվեց քայլերթի դեպի նախագահի նստավայր, որը գտնվում է Մարշալ Բաղրամյան պողոտայում։

Հունիսի 23–ի գիշերը ոստիկանները հատուկ տեխնիկայի կիրառմամբ ցրեցին ցուցարարներին։ Ոստիկանական բաժանմունքներ տեղափոխվեց գրեթե 240 մարդ, այդ թվում` լրագրողներ։ 25 մարդ դիմեց բուժօգնության։