Գուրնով. Երևանի բողոքի ցույցերում ԱՄՆ միջամտության մասին կարծիքը լրագրողական դրոշմ է

ԵՐԵՎԱՆ, 3 հուլիսի– Sputnik. Լրագրողական դրոշմ են պնդումներն այն մասին, թե Երևանի բողոքի ցույցերը կազմակերպել են ամերիկացիները, ուրբաթ Երևանում հայ լրագրողների հետ կազմակերպված կլոր սեղանի ընթացքում ասաց հայտնի ռուս հեռուստամեկնաբան Ալեքսանդր Գուրնովը։

Հունիսի կեսին Հայաստանի հանրային ծառայությունները կարգավորող հանձնաժողովը որոշում ընդունեց 16 տոկոսով բարձրացնել էլեկտրաէներգիայի սակագինը, ընդ որում «Հայաստանի էլեկտրական ցանցեր» ընկերությունն իր հայտում մտադիր էր սակագինը բարձրացնել 40,8 տոկոսով։ Այս ամենը հանգեցրեց բողոքի ակցիայի, որը սկսվեց Երևանում հունիսի 19–ին և հունիսի 22–ին վերածվեց քայլերթի դեպի նախագահի նստավայր, որը գտնվում է Մարշալ Բաղրամյան պողոտայում։

Հունիսի 23–ի գիշերը ոստիկանները հատուկ տեխնիկայի կիրառմամբ ցրեցին ցուցարարներին։ Ոստիկանական բաժանմունքներ տեղափոխվեց գրեթե 240 մարդ, այդ թվում` լրագրողներ։ 25 մարդ դիմեց բուժօգնության։

«Երբ խոսում ենք այն մասին, թե ինչ է տեղի ունենում, հարկավոր է հաշվի առնել, որ օգտագործվում է մի տեխնոլոգիա, որի գլխավոր հատկանիշն աննկատությունն է։ Երբ գրում և ասում են, որ ամերիկացիներն են ստեղծել ներկա իրավիճակը կամ նրանց միջամտությամբ մի խումբ ոչ այնքան խելացի մարդիկ դուրս են եկել Բաղրամյան պողոտա, դա սխալ է, դա լրագրողական դրոշմ է։ Սակայն երբ ասում են, որ ամեն ինչ ցրվեց, և հիմա այնտեղ ընդամենը երեք մարդ է քնում, դա ևս սխալ  է», – ասաց Գուրնովը։ 

Նրա խոսքով` գլխավոր դասը, որը բազմաթիվ հետխորհրդային երկրների ղեկավարությունները պետք է քաղեն, այսպես կոչված, նարջնագույն հեղափոխություններից, այն է, որ ոչ մի դեպքում չի կարելի ժողովրդին հասցնել հուսահատության, մի իրավիճակի, երբ մարդկանց թվում է, թե իրենք կորցնելու բան չունեն, և նրանք չեն հավատում իշխանությունների ոչ մի խոսքին։ 

«Երկրորդ դասն է, երբ նման վիճակում գտնվող մարդիկ հայտնվում են փողոցներում, երբ արտահայտում են իրենց բողոքը, նման դեպքում հարկավոր է արագ և կառուցողական պայմանավորվել` դրսևորելով պատշաճ կոշտություն առաջին քաղաքական նշանաբանների հայտնվելու դեպքում», – նշեց Գուրնովը։

Օրերս հայկական իշխանություններն առաջարկեցին իրականացնել «Հայաստանի էլեկտրական ցանցեր» ընկերության աուդիտ, իսկ այդ ժամանակահատվածում իշխանությունները կսուբսիդավորեն բարձրացված սակագները։ Դրանից հետո ցուցարարների շարքերը պառակտվեցին, նրանց մի մասը հայտարարեց, որ պատրաստ է դադարեցնել ակցիաները։ Իսկ ցուցարարների մյուս մասը մնաց Բաղրամյան պողոտայում` մեղադրելով առաջին խմբին դավաճանության մեջ։