Հունաստանի ԶԼՄ–ներում հայտնվել են հասարակական կարծիքի կեղծ հարցումներ

ԵՐԵՎԱՆ, հուլիսի 3–Sputnik. Հունաստանի խոշորագույն ԶԼՄ–ները հրապարակել են հասարակական կարծիքի հարցման կեղծ արդյունքներ, որոնց համաձայն հուլիսի 5–ի հանրաքվեին հույների մեծամասնությունը կքվեարկի վարկատուների վերջնագրի օգտին։ Ինչպես հաղորդում է  ՌԻԱ Նովոստին, GPO (Greek public opinion) ընկերությունը, որի անունից հրապարակվել է հարցումը, մտադիր է «բոլոր օրինական միջոցներով» պաշտպանել իր շահերը։

Տեսաբանները հարցումների հետ կապված իրավիճակն անվանել են «կասկածելի քաղաքական խաղեր»։

ԶԼՄ–ներում հուլիսի 1–ից հայտնվել են հարցման տվյալներ, որոնց համաձայն հանրաքվեի ժամանակ մտադիր է կողմ քվեարկել ընտրողների 43,3 տոկոսը, դեմ` 39,9 տոկոսը։ ԶԼՄ–ներում որոշել են նրանց հնարավոր թիվը, որոնք կարտահայտվեն վարկատուների առաջարկների օգտին` 47,1 տոկոս, իսկ նրանք, որոնք ոչ կասեն` 43,2 տոկոսը։

GPO ընկերության անունից «հարցումը» հրապարակել են տանսյակ ԶԼՄ–ներ, այդ թվում` խոշոր արտասահմանյան տեղեկատվական գործակալություններ։ Դրանից հետո հետևել է ընկերության հերքումը։

«Առանց GPO իմացության և ընկերության նվազագույն մասնակցության ԶԼՄ–ներում հրապարակվել են կցկտուր հետազոտություններ հուլիսի 5–ի հանրաքվեի վերաբերյալ։ Այդ փաստի հետ կապված` GPO–ն հայտարարում է, որ ոչ մի պատասխանատվություն չի կրում և բոլոր օրինական միջոցները կձեռնարկի իր շահերի պաշտպանության համար»,– ասվում է GPO–ի կայքի հայտարարությունում։

Ընկերությունն ուշադրություն է դարձնում նրան, որ օրենքը թույլ է տալիս տեղեկացնել քաղաքացիներին հետազոտությունների արդյունքների մասին։

«Բայց դա պետք է կատարվի պատասխանատու և համապարփակ կերպով և հասարակական կարծիքի ուսումնասիրման ընկերությունների մասնակցությամբ, ինչպես դա պահանջում է օրենքը։ Այդպես պետք է լինի միշտ, այդպես պետք է լինի նաև հիմա, երբ հույն ժողովուրդը կանգնած է կարևոր ընտրության առաջ»,– ասվում է հայտարարությունում։

Հարցումների համաձայն, որը հուլիսի 1–ին հրապարակել է «Խմբագիրների թերթը», հանրաքվեի նկատմամբ վերաբերմունքը Հունաստանում արագ փոխվում է։ Մինչև բանկերի փակումը 57 տոկոսը պատրաստ են եղել ոչ ասել վարկատուների վերջնագրերին, 30 տոկոսը` աջակցել դրան, իսկ 13 տոկոսը չեն կողմնորոշվել։ Բանկային արձակուրդներ հայտարարելուց և կանկխիկ փող տրամադրելու սահմանափակումներից հետո վերջնագրի հակառակորդների թիվը նվազել է մինչև 46 տոկոս, նրա կողմնակիցների թիվն աճել մինչև 37 տոկոս, չի կողմնորոշվել հարցվածների 17 տոկոսը։

«Էթնոս» թերթը հուլիսի 3–ին հրապարակել է Alco ընկերության հարցումը, որի համաձայն «այո» կասի հարցվածների 41,5 տոկոսը, «ոչ»` 40,2 տոկոսը։