ԵՐԵՎԱՆ, 3 հուլիսի. — Sputnik. Ամառային եղանակը, անկասկած, բարերար ազդեցություն է գործում մարդու օրգանիզմի վրա, բայց միաժամանակ, կարող է առաջացնել առողջական զանազան խնդիրներ, հատկապես, երբ միջին ջերմաստիճանը գերազանցում է այն ցուցանիշը, որին մարդու օրգանիզմն ի վիճակի է դիմանալու։
Հայաստանի պայմաններում` Արարատյան դաշտավայրում, ամենաշոգ ժամանակահատվածը հուլիսի 3-րդ տասնօրյակն է և օգոստոսի առաջին տասնօրյակը:
Հաշվի առնելով վերոնշյալը` Հայաստանի առողջապահության նախարարությունը հորդորում է խուսափել արևի ուղիղ ճառագայթներից` հատկապես ժամը 12:00-17:00 ընթացքում, աշխատել քայլել ստվերում, կրել գլխարկ, արևային ակնոց, հովանոց, հագնել սպիտակ և/կամ բաց երանգների ազատ, օդաթափանց, բամբակյա կտորից հագուստ ուլտրամանուշակագույն ճառագայթներից պաշտպանվելու համար, ամենօրյա աշխատանքները կատարել օրվա համեմատաբար զով ժամերին, ցերեկային ամենաշոգ ժամերին խուսափել բացօթյա ծանր ֆիզիկական աշխատանքից։
Նախարարությունը խորհուրդ է տալիս օգտագործել մեծ քանակությամբ հեղուկ, չչարաշահե´լ կոֆեին և շաքար պարունակող ըմպելիքները։ Արգելվում է գտնվել չօդափոխվող կամ վատ օդափոխվող տարածքներում, երկար ժամանակ մնալ արևի տակ կայանված փոխադրամիջոցներում, երեխաներին թողնել փակ պատուհաններով ավտոմեքենաներում։
«Ինչ վերաբերում է սննդամթերքին, ապա այն պետք է լինի թարմ, ոչ ժամկետանց, պետք չէ գնել սննդամթերքն արևի ճառագայթների և մթնոլորտային տեղումների, ինչպես նաև փոշու, ավտոտրանսպորտի արտանետումների անմիջական ազդեցության ներքո գտնվող մայրուղիներում։ Օգտագործելուց առաջ միրգը և բանջարեղենը պետք է լավ լվանալ հոսող մաքուր ջրով, պահպանել դրանք և մյուս սննդամթերքը սառնարանում»,-ասված է նախարարության խորհուրդներում։
Երկրի առողջապահական գերատեսչությունը չափազանց կարևորում է նաև հիգինեայի կանոնների պահպանումը` «ձեռքերը պետք է լվանալ հաճախակի, յուրաքանչյուր անգամ սնունդ պատրաստելուց և ուտելուց առաջ, զուգարանից օգտվելուց հետո«։
Նախարարությունը հորդորում է առանձին ուշադրություն դարձնել երեխաներին` զերծ պահելով նրանց դեկորատիվ ջրավազաններում լողանալուց, քանի որ դրանք նախատեսված չեն լողի համար, ինչպես նաև լող չկազմակերպե´լ նաև գետերի, լճակների աղտոտված ափերով և ջրով հատվածներում:
«Ցանկալի է, որ երեխաները, հղիները, ծերերը, ինչպես նաև քրոնիկ հիվանդություններով տառապող մարդիկ ցերեկային ամենաշոգ ժամերին մնան տանը, քնեն կամ պառկեն, քանի որ պառկած դիրքում
ջերմատվությունը և արյան շրջանառությունն ավելի դյուրին է կատարվում»,-եզրափակվում է նախարարության խորհուրդները։
