Պատգամավոր. Հայաստանը ՌԴ–ից զենք է գնում գործարանային գներով

ԵՐԵՎԱՆ, հուլիսի 2–Sputnik. Հայաստանը և Բելառուսը միակ երկրներ են, որոնց Ռուսաստանը զենք և ռազմական տեխնիկա է վաճառում գործարանային գներով, հայտարարեց իշխող Հայաստանի հանրապետական կուսակցության (ՀՀԿ) խորհրդարանական խմբակցության անդամ, ֆինանսաբյուջետային հարցերով մշտական խորհրդարանական հանձնաժողովի ղեկավար Գագիկ Մինասյանը։

Հայաստանի խորհրդարանը հինգշաբթի արտահերթ նիստում վավերացրել է Ռուսաստանի կողմից 200մլն դոլար պետական արտահանման վարկ տրամադրելու մասին համաձայնագիրը` սպառազինությունների նորագույն տեսակներ գնելու համար։ Վարկը տրամադրվում է 13 տարով `3 տարվա արտոնյալ ժամկետով և 3 տոկոս տարեկան տոկոսադրույքով։

Հայաստանին ռուսական վարկ տրամադրելու մասին հայտարարվել է հունիսի 27–ին Երևանում Հայաստանի նախագահ Սերժ Սարգսյանի և ՌԴ տրանսպորտի նախարար, հայ–ռուսական միջկառավարական հանձնաժողովի համանախագահ Մաքսիմ Սոկոլովի հանդիպումից հետո։

«Դա շատ կարևոր համաձայնագիր է։ Ցանկանում եմ ընդգծել, որ ՌԴ–ի վարկի տրամադրումն իսկույն կգնա արտադրողից գործարանային գներով գերժամանակակից ռազմական տեխնիկայի գնմանը»,– ասաց Մինասյանը։

Նա նշեց, որ Հայաստանը ՌԴ–ից ստանում է զենք և ռազմական տեխնիկա նույն գներով, ինչ և Ռուսաստանի պաշտպանության նախարարությունը։

Հայ–ռուսական համաձայնագիրը նախատեսում է ռուսական արտադրության ռազմական արտադրանքի ձեռք բերում 2015-2017թթ. ընթացքում։