Հայաստանը կֆինանսավորի Համահայկական խաղերում սիրիահայերի մասնակցությունը

ԵՐԵՎԱՆ, հուլիսի 2–Sputnik. Հայաստանի կառավարության նիստը հինգշաբթի հավանություն է տվել գալիք Համահայկական ամառային խաղերին սիրիական պատվիրակության մասնակցությունն ապահովելու համար 39,8 մլն դրամ (շուրջ 84,3 հազար դոլար) տրամադրելու որոշման նախագծին։

6–րդ Համահայկական խաղերը մեկնարկում են օգոստոսի 2–ին և կտևեն մինչև 2015թ.–ի օգոստոսի 13–ը։

«Նախատեսվում է սպորտի և երիտասարդության հարցերի նախարարությանը պահուստային ֆոնդից ֆինանսական միջոցներ հատկացնել` խաղերին մասնակցող սիրիական պատվիրակության ծախսերը հոգալու համար»,– հինգշաբթի կառավարության նիստում ասաց Հայաստանի ֆինանսների նախարարի տեղակալ Պավել Սաֆարյանը։

Համահայկական խաղերի համաշխարհային հանձնաժողովի (կազմկոմիտե) նախագահ Իշխան Զաքարյանի խոսքով` նշված գումարը կծախսվի Հայաստանում սիրիական պատվիրակության 82 ներկայացուցիչների թռիչքի և բնակության վրա։

Հուլիսի 1–ի տվյալներով` կազմկոմիտեն ստացել է մոտ 5,5 հազար հայտեր աշխարհի 35 երկրների սիրողական մարզիկներից։ Համահայկական խաղերի մասնակիցները կպայքարեն 17 մարզաձևերում պարգևների համար, այդ թվում` ֆուտբոլ, բասկետբոլ, վոլեյբոլ, ֆուտզալ, թենիս, սեղանի թենիս, շախմատ, բադմինտոն, լող, թեթև ատլետիկա։

Առաջին Համահայկան խաղերը Հայաստանում կայացել են 1999թ.–ին, դրանց մասնակցել են 23 երկրների մարզիկներ։ Իսկ Ձմեռային Համահայկական խաղերն առաջին անգամ տեղի են ունեցել Ծաղկաձոր քաղաքում 2014թ.–ի փետրվարի 24–ից մարտի 2–ը։