ՄՏՍ–ի հայ «դուստրը» նշում է տասնամյա հոբելյանը

ԵՐԵՎԱՆ, հուլիսի 1 – Sputnik. Հայկական հեռահաղորդակցային VivaCell-MTS ընկերությունը` «Մոբիլնիե Տելեսիստեմի» ԲԲԸ  (ՄՏՍ) դուստր ձեռնարկությունը, չորեքշաբթի նշում է  գործունեության տասնամյակը։

«Մենք մեծ հաջողությունների ենք հասել տասը տարվա ընթացքում` հաղթանակով դուրս գալով   ցանկացած բարդ իրավիճակից։ Այսօր մենք առաջինն ենք ամեն ինչում` լինելով առաջատար ինչպես բաժանորդների թվով, այնպես էլ եկամուտների առումով` շնորհիվ մեր հզոր, ժամանակակից և ընդարձակ ցանցի», – տոնական միջոցառման ժամանակ հայտարարել է VivaCell-MTS–ի գլխավոր տնօրեն Ռալֆ Յիրիկյանը

Նրա խոսքերով` Հայաստանում աշխատելու տասը տարվա ընթացքում VivaCell-MTS-ի կապիտալ ներդրումները գերազանցել են 183 մլրդ. դրամը (շուրջ 388 մլն. դոլար)։Կազմակերպությունը ներդրել է շուրջ 28.9 մլրդ. դրամ (մոտ 61.1 մլն. դոլար) կորպորատիվ սոցիալական պատասխանատվության շրջանակում ծրագրեր իրականացման համար։

Կազմակերպության գլխավոր տնօրենը հայտնեց, որ VivaCell-MTS–ի մասնաբաժինը շուկայում կազմում է ավելի քան 60 տոկոս, կազմակերպությունն ունի 3G սերնդի 1150 բջջային կապի բազային կայան և 4G սերնդի` 250 բազային կայան։

Նրա տվյալներով` VivaCell-MTS–ի բաժանորդների քանակը գերազանցել է 2 մլն. մարդը, այսօրվա դրությամբ տվյալների փոխանցման ծառայություններից օգտվողների թիվը կազմում է 1.12 մլն. բաժանորդ։

VivaCell-MTS (Ղ-Տելեկոմ) ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին։ –0–