«Ինտեր ՌԱՕ»–ն չի հաստատում «Հայաստանի էլեկտրական ցանցերի» վաճառքի մասին լուրը

ԵՐԵՎԱՆ, 29 հունիսի–Sputnik. «Ինտեր ՌԱՕ» ռուսական պետական հոլդինգը  չի հաստատում «Հայաստանի էլեկտրական ցանցեր» դուստր ընկերության վաճառքի մասին լուրը։

«Բանակցություններ չենք վարում, վաճառք չենք նախատեսում», –  Reuters գործակալությունը մեջբերում է ռուսական ընկերության ներկայացուցիչ Անտոն Նազարովի խոսքերը։

«Կոմերսանտի» տվյալներով` «Ինտեր ՌԱՕ» ընկերությունը նախատեսում է վաճառել «Հայաստանի էլեկտրական ցանցերը» Հայաստանում շարունակվող բողոքի ցույցերի կապակցությամբ և փնտրում է պրոբլեմային ակտիվի գնորդ։ Երևանում զրուցակցի խոսքերով` ՀԷՑ—ը կարող է գնել Ռուսաստանում բնակվող ազգությամբ հայ միլիարդատեր Սամվել Կարապետյանը, ով «Տաշիր» խմբի սեփականատերն է։ Ակտիվի վաճառքի քննարկումը սկսվել էր դեռևս սակագնի բարձրացումից առաջ, նշել է աղբյուրներից մեկը։

Հայաստանի հանրային ծառայությունները կարգավորող հանձնաժողովը հունիսի 17–ին որոշել է օգոստոսի 1–ից 16 տոկոսով բարձրացնել ՀԷՑ–ին տրամադրած էլեկտրաէներգիայի սակագները։ Դա հանգեցրել է Երևանում բողոքի զանգվածային ակցիային։