ԵՐԵՎԱՆ, 24 ապրիլի – Sputnik. Հռոմի Պապ Լևոն XIV-ը իր հետ կրում է մահմեդական երեխայի լուսանկարը, որին հանդիպել էր Լիբանան կատարած այցի ժամանակ, և որը սպանվեց վերջին պատերազմում: Այս մասին Լևոն XIV-ը լրագրողներին պատմել է Հասարակածային Գվինեայի Մալաբո քաղաքից Հռոմ թռիչքի ժամանակ որտեղ նա ավարտել է Աֆրիկայի երկրներով իր ուղևորությունը։ Տեղեկությունը հաղորդում է Վատիկանի պաշտոնական տեղեկատվական ռեսուրսը՝ «Vatican News»-ը:
Նա հավելել է, որ Իրանում իրավիճակը շատ բարդ է, համաշխարհային տնտեսության համար` կրիտիկական, իսկ բուն Իրանում տուժում է ամբողջ բնակչությունը։ Կարևոր է շարունակել խաղաղ երկխոսությունը, ջանքեր գործադրել դրա ուղղությամբ՝ պահպանելով միջազգային իրավունքը։ Դա կարևոր է անմեղ մարդկանց պատերազմից պաշտպանելու համար, ինչը, ցավոք, միշտ չէ, որ արվում է։
«Ես ինձ մոտ պահում եմ մահմեդական երեխայի նկարը, որը Լիբանան կատարած իմ այցի ժամանակ կանգնած էր սպասողների մեջ՝ «Բարի գալուստ, պապ Լևոն» պաստառով: Այս պատերազմի վերջին օրերին նա սպանվեց։ Որպես եկեղեցու հովիվ՝ ես չեմ կարող աջակցել պատերազմին, ուստի կոչ եմ անում բոլորին պահպանել խաղաղության, այլ ոչ թե ատելության մշակույթը», - հայտարարել է Հռոմի պապը։
Հիշեցնենք, որ մոտ երկու շաբաթ առաջ ԱՄՆ նախագահ Դոնալդ Թրամփը կտրուկ քննադատել էր Լևոն XIV-ին, երբ վերջինս հայտարարել էր, որ Իրանի դեմ ԱՄՆ-ի և Իսրայելի պատերազմը սնուցվում է ամենազորության պատրանքով: Ի պատասխան՝ Թրամփը Լևոն XIV-ին անվանել էր «թույլ» և հայտարարել, որ «չի ցանկանում տեսնել Հռոմի պապին, որը կարծում է, թե նորմալ է, որ Իրանը միջուկային զենք ունենա», ինչին ի պատասխան՝ Հռոմի պապը հայտարարել էր, որ չի վախենում Թրամփի վարչակազմից և կշարունակի բացահայտ ասել Ավետարանի ճշմարտությունները: