«Ուժեղ Հայաստան» կուսակցության առաջնորդ, գործարար և բարերար Սամվել Կարապետյանի ավագ որդին՝ Սարգիսը, ֆրանսերենով դիմել է Ֆրանսիայի նախագահ Էմանուել Մակրոնին։
Նշենք, որ Էմանուել Մակրոնը Հայաստան է ժամանելու մայիսի 5-ին՝ մասնակցելու Եվրոպական քաղաքական համայնքի գագաթնաժողովին։ Նախորդ անգամ նա Հայաստանում էր 2018 թվականին կնոջ՝ Բրիջիթ Մակրոնի հետ։
Կարապետյանն ընդգծել է՝ այն, որ Մակրոնը մայիսին վերադառնալու է Հայաստան, լավ է, ու հայ ժողովուրդն էլ գնահատում է երկու երկրի միջև եղած բարեկամությունը։
«Դուք գալիս եք Հայաստան մի մարդու հրավերով, որին անվանում եք Ձեր ընկերը, բայց որը հայ ժողովրդի թշնամին է։ Նիկոլ Փաշինյանն այն չէ, ինչ պնդում է՝ միջազգային հանրության խաբելով և ժողովրդավարական արժեքների հետևում թաքնվելով։ Նա երկիրը մղել է իրավական քաոսի՝ հարձակվելով մեր եկեղեցու, մեր սփյուռքի, և իր քաղաքական հակառակորդների վրա։ Ցանկացած բնռապետություն կնախանձեր այդքան մեծ թվով քաղբանտարկյալների»,- ասում է Սարգիս Կարապետյանը։
Նա ուղերձում նշում է, որ ընդունելով Փաշինյանի հրավերը ընտրություններից 2 ամիս առաջ, նրան ևս մեկ հնարավորություն է տրվում՝ խաբելու հայ ժողովրդին։ Քաղաքական գործչի որդին պնդում է՝ ՀՀ այժմյան ղեկավարի հետ հանդիպումն անիմաստ է, քանի որ 2 ամսից Սամվել Կարապետյանը կդառնա Հայաստանի վարչապետ։
«Եթե ձեզ համար կարևոր են ժողովրդավարական արժեքները, նախ պետք է հանդիպեք նրա հետ, նա կալանքի տակ է։ Մենք ձեզ հրավիրում ենք այցելել մեզ։ Դուք ձեզ կզգաք ինչպես տանը»,- վստահեցնում է Սարգիս Կարապետյանը։
Հիշեցնենք, որ Սամվել Կարապետյանի տանը 2025 թվականի հունիսի 17-ին խուզարկություն էր իրականացվել այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա: Կարապետյանը կալանավորվեց հունիսի 18-ին։
Կարապետյանը մեղադրվում է հարկերը, տուրքերը կամ այլ վճարներ չվճարելու, փողերի լվացման և իշխանությունը զավթելուն ուղղված հոդվածներով։ Դեկտեմբերի 30-ից Կարապետյանը տնային կալանք է կրում, վճարվել է նաև գրավ։ 2026 թվականի ապրիլի 17-ին գործարարի տնային կալանքը երկարաձգվեց ևս 3 ամսով, բայց միաժամանակ դատարանը նրան թույլ տվեց հարցազրույցներ տալ։