ԵՐԵՎԱՆ, 15 ապրիլի – Sputnik. ՌԴ ՊՆ–ն մի շարք եվրոպական երկրների կողմից Ուկրաինայի համար անօդաչուների արտադրությունն ու մատակարարումը մեծացնելու որոշումը դիտարկում է որպես քայլ, որը հանգեցնում է իրավիճակի կտրուկ սրման ամբողջ եվրոպական մայրցամաքում։
ՌԴ ՊՆ–ի տեղեկություններով` համապատասխան որոշումը կայացվել է 2026 թվականի մարտի 26-ին՝ Ուկրաինայի զինված ուժերում աճող կորուստների և կենդանի ուժի հետզհետե վատթարացող իրավիճակի ֆոնին։
Նախարարությունը նշել է, որ Կիևի ռեժիմի համար անօդաչուների արտադրության զգալի աճը նախատեսվում է իրականացնել եվրոպական երկրների տարածքում գտնվող հարվածային անօդաչուների և դրանց բաղադրիչների արտադրության «ուկրաինական» և «համատեղ» ձեռնարկությունների ֆինանսավորումն ընդլայնելու հաշվին։
«Այս որոշումը դիտարկում ենք որպես միտումնավոր քայլ, որը հանգեցնում է ռազմաքաղաքական իրավիճակի կտրուկ սրմանը ամբողջ եվրոպական մայրցամաքում և այդ երկրների վերածմանը Ուկրաինայի ռազմավարական թիկունքի։ Ռուսաստանի դեմ ահաբեկչական հարձակման սցենարների իրականացումը, որոնք հայտարարվել են Կիևի ռեժիմի ներկայացուցիչների կողմից՝ օգտագործելով Եվրոպայում արտադրված իբր «ուկրաինական» ԱԹՍ–ներ, անկանխատեսելի հետևանքների է տանում», – ասվում է ՌԴ ՊՆ–ի հայտարարության մեջ։
Նախարարությունը նշել է, որ եվրոպական պետությունների անվտանգությունն ամրապնդելու փոխարեն, եվրոպացի առաջնորդների գործողությունները ավելի ու ավելի արագ են ներքաշում այդ երկրները Ռուսաստանի հետ պատերազմի մեջ։
Ռուսաստանը ռազմական գործողություն է սկսել Ուկրաինայում 2022 թվականի փետրվարի 24-ին։ Նախագահ Վլադիմիր Պուտինն այն անվանել է ի պաշտպանություն նրանց, որոնք Կիևի ռեժիմի կողմից 8 տարի շարունակ ենթարկվում են ծաղրուծանակի, ցեղասպանության: Դրա համար նախատեսվում է իրականացնել Ուկրաինայի ապառազմականացում և ապազգայնականացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։