ԵՐԵՎԱՆ, 14 ապրիլի - Sputnik. ԱՄՆ-ում մեկնարկել են լիբանանա-իսրայելական հակամարտության կարգավորման շուրջ բանակցությունները։ Այս մասին հայտնում է «Известия» թերթը:
Նշվում է, որ ամերիկյան պատվիրակության կազմում են ԱՄՆ պետքարտուղար Մարկո Ռուբիոն, Բեյրութում ԱՄՆ դեսպան Միշել Իսսան և Պետդեպարտամենտի խորհրդական Մայքլ Նիդհեմը:
Իսրայելի և Լիբանանի պատվիրակությունները գլխավորում են դեսպաններ Յեքիել Լեյթերը և Նադա Համադե Մոավադը. նրանք փոխադարձ երկխոսություն կվարեն անվտանգության և ինքնիշխանության հարցերի շուրջ:
Վաշինգտոնում ընթացող բանակցություններում կշարունակվի Իսրայելի հյուսիսային սահմանի երկարաժամկետ անվտանգության, ինչպես նաև Լիբանանի տարածքի և քաղաքական կյանքի նկատմամբ Լիբանանի կառավարության լիակատար ինքնիշխանության վերականգնման հարցերի քննարկումը:
Ավելի վաղ Axios պորտալը հայտնել էր, որ Լիբանանը ամերիկացի միջնորդների միջոցով Իսրայելին խնդրել է դադարեցնել հարվածներն իր տարածքին ԱՄՆ-ի և Իրանի բանակցությունների նախաշեմին: Դրանից հետո Իսրայելի վարչապետ Բենիամին Նեթանյահուի մամուլի ծառայությունը հայտնել էր, որ նա կառավարությանը հանձնարարել է ուղիղ բանակցություններ սկսել Լիբանանի հետ, որոնց նպատակը կլինի շիական «Հզբոլլահ» շարժման զինաթափումն ու երկու պետությունների միջև խաղաղության հաստատումը: