Թեհրանն ԱՄՆ-ի և նրա դաշնակիցների հարվածների հետևանքով ստացած վնասի փոխհատուցում է պահանջելու, իսկ մերժման դեպքում այն կստանա ամերիկյան ակտիվների և սեփականության առգրավմամբ: Այս մասին ՏԱՍՍ-ին հայտնել է Հնդկաստանում ԻԻՀ գերագույն առաջնորդի ներկայացուցիչ Աբդուլ Մաջիդ Հաքիմ Իլահին։
Ինչպես նշել է Իլահին, հրադադար հաստատելու Իրանի ծրագրի տասը կետերից մեկը, որն ընդունվել է Վաշինգտոնի կողմից, վնասի փոխհատուցման մասին է:
«Մենք նրանց կստիպենք վճարել, նրանք պետք է վճարեն։ Հակառակ դեպքում մենք գիտենք` ինչպես փոխհատուցում ստանալ նրանց ակտիվներից կամ սեփականությունից», – ասել է նա:
Իլահին հայտնել է, որ միայն Թեհրանում 37 հազար տուն է ավերվել։
«Բացի այդ, այստեղ ավերվել են բազմաթիվ հիվանդանոցներ, համալսարաններ, զոհվել են նաև բազմաթիվ խաղաղ բնակիչներ։ Նրանք քանդել են ամեն ինչ: Եվ հիմա նրանք ստիպված կլինեն վճարել դրա համար», - ասել է նա:
Պատասխանելով հարցին, թե որ երկրներից է Թեհրանը փոխհատուցում պահանջում, Իրանի գերագույն առաջնորդի ներկայացուցիչը նշել է, որ բացի ԱՄՆ-ից և Իսրայելից, խոսքը վերաբերում է նրանց աջակցողներին:
Հիշեցնենք` ԱՄՆ–ն ու Իսրայելը փետրվարի 28-ի առավոտյան սկսեցին հարվածներ հասցնել Իրանին։ Սպանվեցին երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին: Մարտի 18–ին հայտնի դարձավ, որ սպանվել են նաև Իրանի գերագույն ազգային անվտանգության խորհրդի քարտուղար Ալի Լարիջանին, նրա որդին ու հատուկ օգնականը` Մորթեզա Լարիջանին։
Իրանը մարտի 1–ից պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին:
Ապրիլի 8-ի գիշերը ԱՄՆ նախագահ Դոնալդ Թրամփը համաձայնել է երկու շաբաթով դադարեցնել Իրանի ուղղությամբ հարվածները և հավաստիացրել է, որ հրադադարը կլինի երկկողմանի։ Իրանի ազգային անվտանգության գերագույն խորհուրդը հայտարարել է, որ Թեհրանը ԱՄՆ-ի հետ բանակցություններ կսկսի ապրիլի 10-ին Իսլամաբադում (Պակիստան)։