ԵՐԵՎԱՆ, 4 ապրիլի – Sputnik. «Հարավկովկասյան երկաթուղի» ընկերության հետ կապված բանակցությունները ՌԴ գործընկերների հետ շարունակվում են։ Այս մասին այսօր «Քաղաքացիական պայմանագիր» կուսակցության արտահերթ համագումարից հետո լրագրողների հետ զրույցում ասաց ՀՀ արտաքին գործերի նախարարի տեղակալ Վահան Կոստանյանը։
«Տարբեր մակարդակներում քննարկվում է, բայց այս պահին հրապարակման ենթակա որևէ բան չկա»,– ավելացրեց նա։
ՀՀ փոխարտգործնախարարն այդպես էլ չհստակեցրեց՝ արդյոք ՀՀ վարչապետ Նիկոլ Փաշինյանի մոսկովյան այցի փակ հատվածում հարցը քննարկվել է։
«Արդեն պատասխանեցի»,- կարճ արձագանքեց նա։
Հիշեցնենք` հայկական երկաթուղին ՀԿԵ-ի կոնցեսիոն կառավարմանն է հանձնվել 30 տարով 2008 թվականի փետրվարին՝ ևս 10 տարի երկարաձգելու իրավունքով։ Փետրվարի 13-ին Փաշինյանն առաջարկեց Հայաստանի երկաթուղիների կոնցեսիոն կառավարումը վաճառել Երևանի և Մոսկվայի բարեկամ երկրի։ Իսկ մարտի 26-ին հայտարարեց, որ Երևանը դեմ չէ Հայաստանի երկաթուղին ղազախական կոնցեսիոն կառավարման հանձնելու տարբերակին, եթե այդ հարցում համաձայնություն ձեռք բերվի Ռուսաստանի հետ: ՌԴ տրանսպորտի նախարար Անդրեյ Նիկիտինը մարտի 3-ին հայտնեց, որ ՌԴ–ն Հայաստանի երկաթուղու կառավարումը Ղազախստանին հանձնելու հարցով բանակցություն չի վարում։