ԵՐԵՎԱՆ, 16 փետրվարի – Sputnik․ Հայ եկեղեցու գերագույն առաջնորդի և հոգևորականության դեմ քաղաքական բնույթի արշավն անթույլատրելիորեն խախտում է հայ ազգային ինքնության կարևորագույն սյուներից մեկը, թուլացնում ամբողջ ազգին՝ Հայաստանում և սփյուռքում։ Այս մասին նշված է ֆրանսահայ կազմակերպությունների համակարգող խորհրդի տարածած հայտարարության մեջ։
Խորհուրդը ցավում և դատապարտում է Հայ առաքելական եկեղեցու դեմ իրականացված ճնշումները, շեշտում՝ այս ճնշումների նոր սրացումն Ամենայն հայոց կաթողիկոս Գարեգին Բ-ի դեմ սկսված անօրինական հետապնդումն է, ինչով իշխանությունն ակնհայտորեն ներխուժում է հոգևորականության բացառիկ իրավասության մեջ։
«Ներկայում, երբ հայ ազգը բախվում է արտաքին լուրջ սպառնալիքների, չի կարելի թույլ տալ նման բնույթի բախումներ, որոնք անարժան են և կործանարար ազգի միասնության և բարոյական ուժի համար։ Խորհուրդը կոչ է անում վարչապետ Նիկոլ Փաշինյանին և կառավարությանը միավորվել և անհապաղ վերջ դնել այս խախտումներին, որոնք հիշեցնում են ստալինյան դարաշրջանի գործելակերպը և մեր պատմության ամենամութ ժամերը»,- նշված է տարածված հայտարարության մեջ։
Խորհուրդը նաև կոչ է անում անհապաղ վերանայել Ամենայն հայոց կաթողիկոսի, Գերագույն հոգևոր խորհրդի վեց եպիսկոպոսների և խորհրդի քարտուղարի դեմ կայացված անօրինական որոշումները։ Միաժամանակ ֆրանսահայ կազմակերպությունների համակարգող խորհուրդն իր լիակատար աջակցությունն է հայտնում վեհափառին։
Նշենք, որ փետրվարի 16-19-ը Ավստրիայի Սանկտ Փյոլթըն քաղաքում Ամենայն հայոց կաթողիկոս Գարեգին Երկրորդի հրավերով պետք է տեղի ունենա Եպիսկոպոսաց ժողովը։ Հունվարի 29-ին ՔԿ–ն հայտնեց, որ Հայաստանյայց առաքելական եկեղեցու դեմ քրեական վարույթ է նախաձեռնել Մասյացոտնի թեմի նախկին առաջնորդ, կարգալույծ արված Գևորգ եպիսկոպոս Սարոյանի (Արման Սարոյանի) «գործով» (դատական ակտը չկատարելը)։
Հունվարի 31-ին 6 բարձրաստիճան հոգևորականներ գործի շրջանակում հարցաքննության կանչվեցին ՀՀ քննչական կոմիտե, որտեղ նրանց նկատմամբ խափանման միջոց ընտրվեց բացակայելու արգելքը։
Եպիսկոպոսաց ժողովը կայանալու է, վայրն էլ անփոփոխ է․ Մայր աթոռ
Եպիսկոպոսաց ժողովը կայանալու է, վայրն էլ անփոփոխ է․ Մայր աթոռ