ԵՐԵՎԱՆ, 20 հունվարի - Sputnik. Չի կարելի համեմատության մեջ դնել ազատության մեջ և կալանքի տակ գտնվող անձանց իրավունքները։ ԱԺ-ում նման կարծիք հայտնեց ՀՀ արդարադատության փոխնախարար Տիգրան Դադունցը՝ պատասխանելով անկախ պատգամավոր Թագուհի Թովմասյանի դիտարկմանը, որ Շիրակի թեմի առաջնորդ Միքայել արքեպիսկոպոս Աջապահյանը զրկված է հաղորդություն ստանալու իր իրավունքից։
«Ես տեսակցել եմ Միքայել արքեպիսկոպոս Աջապահյանին, որը հիվանդանոցային պայմաններում է կրում իր կալանքը։ Վերջինը զրկված է իր սահմանադրական իրավունքից. չի կարողանում իրացնել իր կրոնական ազատությունն ու մասնակցել պատարագների, հաղորդություն ստանալ։ Գրավոր դիմել եմ նախարարություն, ինձ պարզաբանել են՝ ովքեր կարող են տեսակցել սրբազան հորը, բայց դա խնդրի լուծում չէ։ Փաստացի բուժհաստատությանը կա կցված հոգևոր հովիվ, բայց նրան հնարավորություն չի տրվում պատարագ մատուցելու»,- նշեց Թովմասյանը։
Նա հետաքրքրվեց՝ ինչպես է փոխնախարարը տեսնում տվյալ հարցի լուծումը, քանի որ կրոնական ազատությունը հիմնարար իրավունք է ու անթույլատրելի է դրա ոտնահարումը։
Դադունցն էլ շեշտեց՝ ինքը հարցին մանրամասն ծանոթ չէ ու չի կարող կոնկրետ գործով բովանդակային պատասխան տալ։ Միևնույն ժամանակ ընդգծեց՝ պետք է հասկանալ, որ խոսքը խափանման միջոցի մասին է, ինչը ենթադրում է որոշակի իրավունքների սահմանափակումներ։
«Խափանման միջոց կրող անձին չենք կարող համեմատել ազատության մեջ գտնվող անձի ու նրա սահմանադրական իրավունքների իրացման հետ։ Եթե Ձեր դիտարկումը վերաբերում է ինչ-որ օրենսդրական կարգավորումների թերի լինելուն կամ բացակայությանը, ապա պատրաստ ենք դա քննարկել։ Նախարարություն վերադառնալուն պես կնայեմ Ձեր դիմումը, կրկին կքննարկենք։ Պատրաստ ենք, եթե գործնական բացեր կան, ապա քննարկում իրականացնել դրա շուրջ»,- ասաց արդարադատության փոխնախարարը։