ԵՐԵՎԱՆ, 15 հունվարի – Sputnik. Ադրբեջանի գերությունից վերադարձած Վիգեն Էուլջեքչյանը Քննչական կոմիտեից դուրս գալուց հետո հանդիպել է կնոջ` Լինդա Էուլջեքչյանի հետ։ Հուզիչ տեսանյութը հրապարակել է ՔՊ–ական պատգամավոր Հայկ Սարգսյանը։
Տեսանյութում ամուսինները շփվում են արաբերենով։ Նրանց հանդիպումը կայացել է ավելի քան 5 տարի անց։
Ինչպես արդեն հայտնել ենք, Էուլջեքչյանի կինը՝ Լինդա Էուլջեքչյանը, այսօր Լիբանանից Հայաստան է ժամանել։ Նա Երևանի «Զվարթնոց» օդանավակայանից անմիջապես ուղևորվել էր «Մուրացան» զինվորական հոսպիտալ՝ հանդիպելու ամուսնուն, սակայն նրան արդեն տարել էին զինվորական քննչական վարչություն։
Նշենք, որ 2025 թվականի դեկտեմբերին փաստաբան Լուսիանա Մինասյանը հայտնել էր, որ ադրբեջանական բանտում գտնվող Վիգեն Էուլջեքչյանն առողջական լուրջ խնդիրներ ունի, չի կարողանում քայել։
Հիշեցնենք` ՀՀ վարչապետ Նիկոլ Փաշինյանը հունվարի 14–ին տեղեկացրեց, որ Ադրբեջանը Հայաստանին է փոխանցել 4 գերիների` Դավիթ Դավթյանին, Գևորգ Սուջյանին, Վիգեն Էուլջեքչյանին, Վագիֆ Խաչատրյանին:
Վիգեն Էուլջեքչյանը (ծնված 1979 թ.) առևանգվել ու գերեվարվել է 2020 թ․ նոյեմբերի 10-ին Շուշի քաղաքի մոտակայքում՝ իր հետ ճամփորդող Մարալ Նաջարյանի հետ։ 2021 թ. Էուլջեքյանը 20 տարվա ազատազրկման էր դատապարտվել ահաբեկչության ու վարձկանության շինծու մեղադրանքներով։