Արկադի Ղուկասյանն ու Բակո Սահակյանը նույնպես չեն ընդունել Բաքվի մեղադրանքները

ԵՐԵՎԱՆ, 25 դեկտեմբերի – Sputnik. Բաքվում այսօր շարունակվել է Արցախի նախկին ռազմաքաղաքական ղեկավարների և մյուս գերիների շինծու դատավարությունը, որի ժամանակ նրանցից մի քանիսը հանդես են եկել եզրափակիչ ելույթներով։ Հայտնում են ադրբեջանական լրատվամիջոցները։

Նշվում է, որ այսօր իր եզրափակիչ ելույթն է ավարտել ՊԲ նախկին հրամանատար Լևոն Մնացականյանը։ Ինչպես նաև եզրափակիչ ելույթներով են հանդես եկել Արցախի նախկին նախագահներ Արկադի Ղուկասյանն ու Բակո Սահակյանը։ Նրանք նույնպես չեն ընդունել Բաքվի մեղադրանքները։

Արկադի Ղուկասյանը, մասնավորապես, հայտարարել է, որ հանցավոր չի համարում «Խորհրդային Ղարաբաղ» թերթի գործունեությունը, որտեղ ժամանակին աշխատել է որպես գլխավոր խմբագրի տեղակալ։

Նշենք, որ Արցախի նախկին արտգործնախարար Դավիթ Բաբայանն արդեն հանդես է եկել վերջին խոսքով ու չի ընդունել իր մեղադրանքները։

«Նիստը» կշարունակվի դեկտեմբերի 26-ին:

Հիշեցնենք` 2025–ի հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով:

Հիշեցնենք նաև, որ Բաքվի բանտերում գտնվող հայ գերիները հայտնվել են կատարյալ մեկուսացման մեջ. որևէ միջազգային անկախ կառույց նրանց չի տեսակցում։ Նրանց պահման, առողջական և հոգեբանական վիճակի մասին տեղեկություններ չկան։