ԵՐԵՎԱՆ, 19 դեկտեմբերի – Sputnik. Ադրբեջանից բենզին տեղափոխող բեռնատար գնացքն արդեն Հայաստանում է։ Հանրային հեռուստաընկերությունը հայտնում է, որ բեռը պատկանում է 2 մասնավոր ընկերությունների։
Այս պահին ընկերությունների անունները դեռ չեն հրապարակվել։
22 վագոնից բաղկացած գնացքում 1218 տոննա A95 տեսակի բենզին կա, որը Ադրբեջանից Տավուշի մարզի «Այրում» կայարան է հասել Վրաստանի տարածքով։
Պարզելու համար, թե որ ընկերություններն են ներկրել ադրբեջանական բենզինը` Sputnik Արմենիան դիմեց CPS-Oil, Flash, ինչպես նաև իշխող ուժի պատգամավոր Խաչատուր Սուքիասյանի մամուլի ծառայություն (Սուքիասյանի ընտանիքին են պատկանում Gulf և Ran Oil բենզալցակայանները)։ Բոլորը պատասխանեցին, որ ադրբեջանական բենզինի խմբաքանակի հետ որևէ առնչություն չունեն։ Նավթամթերքի ներկրմամբ են զբաղվում նաև Max Oil-ը և Shell-ը, բայց նրանց հետ կապ հաստատել դեռ չի հաջողվել։
Հիշեցնենք` շուրջ 35 տարվա դադարից հետո առաջին անգամ նոյեմբերի 6-ին Ադրբեջանի տարածքով 1000 տոննա ռուսական ցորեն հասավ Հայաստան։
Նոյեմբերի 7-ի լույս 8-ի գիշերը Ադրբեջանի տարանցիկ ճանապարհով Հայաստան հասավ նաև ղազախական ցորենը։
Դեկտեմբերի 15-ին ՀՀ էկոնոմիկայի նախարար Գևորգ Պապոյանը լրագրողներին հայտնեց, որ Ադրբեջանից Հայաստան առաքվող ցորենի նոր խմբաքանակներ կան, որոնք ներկա պահին ճանապարհին են։ Նրա խոսքով` հայ գործարարների հետ քննարկվել է նաև նույն երթուղով կոնյակ արտահանելու տարբերակը, բայց բիզնեսը նպատակահարմար չի գտել ցամաքային ճանապարհով շշալցված արտադրանքի արտահանումը։