Արցախի նախկին ռազմաքաղաքական ղեկավարներից մի քանիսը Բաքվի «դատին» եզրափակիչ խոսք են ասել

ԵՐԵՎԱՆ, 19 դեկտեմբերի - Sputnik. Այսօր Բաքվում շարունակվել է Արցախի նախկին ռազմաքաղաքական ղեկավարների և մյուս գերիների շինծու դատավարությունը, որի ընթացքում նրանցից մի քանիսը հանդես են եկել եզրափակիչ ելույթներով։

Մասնավորապես, Արցախի նախկին նախագահ Արայիկ Հարությունյանը, Արցախի ՊԲ նախկին հրամանատարի տեղակալ Դավիթ Մանուկյանը, ԱԳ նախկին նախարար Դավիթ Բաբայանը դատարանում եզրափակիչ խոսք են ասել։

Նրանք չեն ընդունել իրենց առաջադրված մեղադրանքները՝ հայտարարելով դատախազների փաստարկների հիմնազուրկ լինելու մասին։ Նրանք իրենց հակափաստարկներն են ներկայացրել մեղադրանքի առնչությամբ։

Հաջորդ նիստը կանցկացվի դեկտեմբերի 22-ին:

Հիշեցնենք` 2025–ի հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով:

Հիշեցնենք նաև, որ Բաքվի բանտերում գտնվող հայ գերիները հայտնվել են կատարյալ մեկուսացման մեջ. որևէ միջազգային անկախ կառույց նրանց չի տեսակցում։ Նրանց պահման, առողջական և հոգեբանական վիճակի մասին տեղեկություններ չկան։