ԵՐԵՎԱՆ, 8 դեկտեմբերի – Sputnik․ Պաշտպանական կողմն այսօր բացարկ է հայտնել անհետ կորած զինծառայող Սարգիս Ղուկասյանի հորեղբոր` Արսեն Ղուկասյանի գործով դատախազ Վազգեն Ռուստամյանին։ Sputnik Արմենիայի հետ զրույցում այս մասին հայտնեց պաշտպան Տաթևիկ Սողոյանը։
Նրա խոսքով՝ բացարկի համար մի քանի հիմք է ներկայացվել․ առաջինն այն է, որ գործն ամբողջությամբ քննված չի եղել։ Նախևառաջ, երբ պաշտպանները հանցագործության մասին հաղորդում են ներկայացրել, դատախազը մերժել է վարույթ նախաձեռնել, որից հետո պաշտպանական կողմը բողոք է ներկայացրել, որն էլ բավարարվել է։ Խոսքը վերաբերում է սեպտեմբերի 29-ին պաշտպանության նախարարության մոտ տեղի ունեցած միջադեպին, երբ անհետ կորած զինծառայողների հարազատների և ռազմական ոստիկանության ծառայողների միջև քաշքշուկ տեղի ունեցավ։
«Բողոքարկման արդյունքում մենք հիմա ունենք նոր քրեական գործ՝ մի խումբ պաշտոնատար անձանց կողմից ենթադրաբար իրենց դիրքը չարաշահելու հետ կապված։ Այսինքն՝ սա այն է, ինչ մենք ասում էինք՝ իրականում պրովոկացիան եղել է ռազմական ոստիկանների կողմից, իսկ դատախազը չէր ցանկացել նախաձեռնել վարույթը»,- բացատրեց Սողոյանը՝ շեշտելով, որ դատախազը կողմնակալ դիրքորոշում է ցուցաբերել։
Բացարկի ներկայացման երկրորդ հիմնավորումն այն է, որ Ռուստամյանը չի սպասել գործով նշանակված բոլոր փորձաքննությունների, մասնավորապես՝ դատաբժշկական փորձաքննության ավարտին, և շտապել են հայտարարել նախաքննության ավարտ։
«Այսինքն՝ որոշեցին, որ արդեն բավարար են ապացույցները, գործի քննությունը շարունակելու կարիք չկա, մինչդեռ օրենքը պահանջում է, որ իրենք ոչ միայն պարզեն անձի մեղավորությունը հավաստող, այսինքն՝ նրան դեմ տվյալներ, այլև կողմ, իսկ այս պարագայում անձի առողջական վիճակի մասին արձանագրությունները նրա համար կարող էին շատ դրական ազդեցություն ունենալ, չեն թողել, որ փորձաքննությունն ավարտին հասցվի, և կիսատ վիճակում գործը դատարան են ուղարկել»,- նշեց փաստաբանը։
Այսպիսով՝ պաշտպանական կողմը ներկայացրել է, որ դատախազը կողմնակալ էր և բազմակողմանի, լրիվ ու օբյեկտիվ քննություն չի իրականացրել։
Երևան քաղաքի ընդհանուր իրավասության դատարանը` Հարություն Մանուկյանի նախագահությամբ, որոշել է առանձին ակտի ձևով հրապարակել որոշումը հունվարի 23-ին՝ առավոտյան 10։30-ին։
Սողոյանը նշեց՝ այս դատական նիստի ընթացքում նախատեսում էին նաև ներկայացնել Արսեն Ղուկասյանի նկատմամբ կիրառված խափանման միջոց տնային կալանքը փոփոխելու կամ վերացնելու վերաբերյալ միջնորդություն ներկայացնել, սակայն բացարկի ներկայացումն այնքան ծավալուն էր, որ դա ևս մնաց հաջորդ դատական նիստին։
Հիշեցնենք, որ արցախյան 44-օրյա պատերազմում անհետ կորած զինծառայողների հարազատները սեպտեմբերի 27-ին պաշտպանության նախարարության վարչական համալիրի մոտ հանդիպում էին պահանջում ՀՀ գլխավոր շտաբի պետ Էդվարդ Ասրյանի, Արցախի ՊԲ նախկին հրամանատար, այժմ պաշտպանության նախարարի խորհրդական Կամո Վարդանյանի հետ։ Ծնողներին խոստացել էին հանդիպումը կազմակերպել սեպտեմբերի 29–ին, սակայն ժամ չէին ասել։ Անհետ կորած զինծառայողների հարազատները երկուշաբթի ժամը 12–ին ՊՆ շենքի դիմաց էին։
Ավելի ուշ հայտնի դարձավ, որ նրանք մի քանի ժամանոց հանդիպում են ունեցել ԳՇ պետ Էդվարդ Ասրյանի հետ։ ՀՀ ՊՆ մամուլի ծառայությունը միաժամանակ հաղորդագրություն տարածեց, որում նշվում էր` ՊՆ–ի մոտ սեպտեմբերի 29–ին ակցիայի որոշ մասնակիցներ ռազմական ոստիկանության ծառայողների ուղղությամբ շշեր են նետել, ինչպես նաև այլ առարկաներով տարբեր գործողությունների դիմել, ինչին ի պատասխան ՌՈ ծառայողների գործողությունները շարունակել են մնալ հարգալից։ Ավելի ուշ խուլիգանություն կատարելու և պաշտոնատար անձի օրինական ծառայողական կամ քաղաքական գործունեությանը միջամտելու հոդվածներով ձերբակալվեցին անհետ կորած զինծառայողերի հարազատներից երկուսը` Ապիջան Սարգսյանն ու Արսեն Ղուկասյանը։ Ապիջան Սարգսյանն ազատ արձակվեց, իսկ Արսեն Ղուկասյանը հոկտեմբերի 7–ին 1 ամսով կալանավորվեց։
Հոկտեմբերի 31-ին Արսեն Ղուկասյանի նկատմամբ ընտրված խափանման միջոցը փոխարինվեց այլընտրանքային խափանման միջոցով` տնային կալանք, 1 մլն դրամ գրավ և բացակայելու արգելք։