ԵՐԵՎԱՆ, 17 հոկտեմբերի – Sputnik. ՀՅԴ Բյուրոն անընդունելի է համարում Հայաստանյայց առաքելական Սուրբ եկեղեցու դեմ իրականացվող հարձակումների հեղինակին արժանացնել Մեծի Տանն Կիլիկիո կաթողիկոս Արամ Ա-ի հատուկ ուշադրությանը։ Այս մասին ասված է Բյուրոյի տարածած հայտարարությունում։
Երեկ հայտնել էինք, որ Շահան արքեպիսկոպոս Սարգիսյանը Մեծի Տանն Կիլիկիո կաթողիկոս Արամ Ա–ի անունից ՀՀ վարչապետ Նիկոլ Փաշինյանին էր նվիրել Արամ Ա–ի գահակալության 30–ամյակի առիթով հրատարակված հատորը։ Նշվում էր, որ արքեպիսկոպոսը վարչապետ Փաշինյանին է փոխանցել նաև Արամ Ա կաթողիկոսի ջերմ ողջույններն ու օրհնությունը։
«Անթույլատրելի ենք համարում այդ բոլորի հեղինակին (նկատի ունեն Նիկոլ Փաշինյանին – խմբ․) արժանացնել Մեծի Տանն Կիլիկիո կաթողիկոս Ն.Ս.Օ.Տ.Տ. Արամ Ա-ի հատուկ ուշադրությանը, ինչը բնականորեն առաջացրել է Սփյուռքի և Հայաստանի հայ հասարակության արդար վրդովմունքը։ Հայաստանում տեղի ունեցողը ծրագրված հարձակում է ոչ միայն հայ եկեղեցու, այլև հավատավոր ողջ ժողովրդի, նրա ինքնության և ազգային նկարագրի վրա։ Այն երբեք չի կարելի դիտարկել որպես եկեղեցու և պետության միջև հակամարտություն»,- ասված է հայտարարության մեջ։
ՀՅԴ Բյուրոն դատապարտելի է համարում վերջին օրերին ՀՀ իշխանությունների կողմից բարձրաստիճան հոգևորականների կալանավորումները և եկեղեցու թիրախավորումը։ Նշվում է, որ դրանք հրամայական պահանջ են առաջացնում կաթողիկոսական աթոռների համատեղ ջանքերով պաշտպանելու հայ ժողովրդի կյանքում բացառիկ ազգային արժեք ներկայացնող եկեղեցին:
Բյուրոն հորդորում է, որպեսզի ՀԱՍԵ երկու կաթողիկոսները սերտ համագործակցությամբ և իրենց շուրջ համախմբված հայ ժողովրդի անմնացորդ աջակցությամբ պաշտպանեն հայ եկեղեցին բոլոր տեսակի քանդիչ, հայ ժողովրդի ինքնությունը խաթարող և նսեմացնող ներքին ու արտաքին ոտնձգություններից։
Ավելի ուշ Մեծի Տանն Կիլիկիո կաթողիկոս Արամ Առաջինը խստորեն դատապարտեց հայ հոգևորականների շարունակվող ձերբակալությունները։
Հիշեցնենք` տևական ժամանակ է` ՀՀ իշխանությունը արշավ է սկսել նաև եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը և Արագածոտնի թեմի դիվանապետ Գարեգին Արսենյանը։