ԵՐԵՎԱՆ, 8 հուլիսի – Sputnik․ «Հայաստանի էլեկտրական ցանցեր» ՓԲԸ–ի գլխամասային գրասենյակում վաղ առավոտից իրավապահները գործողություններ են իրականացնում։ Sputnik Արմենիայի թղթակցի հետ զրույցում ՀԷՑ–ի մամուլի խոսնակ Նատալյա Սարջանյանը հայտնեց, որ իրենք որևէ տեղեկություն չունեն, թե իրավապահ որ մարմինն է ներսում և ինչ է կատարվում։
«Ես, անկեղծ ասած, չգիտեմ։ Մեր աշխատանքը 9-ին է սկսվում, իրավապահները մինչև աշխատանքային օրվա սկիզբն են եկել և որևէ մեկին ներս չեն թողնում։ Գիտեմ, որ գլխավոր տնօրենի ԺՊ-ն այս պահին ներսում է, բայց մյուսներին թույլ չեն տալիս շենք մուտք գործել»,- հայտնեց Սարջանյանը։
Հավելենք, որ առավոտյան իրավապահները մտել են նաև ՀԷՑ -ի տնօրենների խորհրդի նախագահ Նարեկ Կարապետյանի տուն և խուզարկություն են իրականացնում։
Նրա խոսքով՝ ներս չթողնող ոստիկանության ծառայողներն էլ ոչինչ չեն բացատրում, պարզապես արգելում են շենք մտնել։
Հիշեցնենք` ՀՀ վարչապետ Նիկոլ Փաշինյանը հունիսի 18–ին` գործարար, ՀԷՑ–ի սեփականատեր Սամվել Կարապետյանի կալանավորումից ժամեր առաջ, հայտարարեց` հասունացել է պահը, երբ «Հայաստանի էլեկտրական ցանցեր» ՓԲԸ–ն պետք է ազգայնացվի (պետականացվի)։ Փաշինյանը նաև սպառնաց ազատել ՀԷՑ-ի՝ պետության հետ չհամագործակցող աշխատակիցներին։ Հունիսի 24-ին նա հայտարարեց, որ ՀԷՑ–ի պետականացման պլանը պատրաստ է։ Հուլիսի 2-ին Փաշինյանը նախազգուշացում արեց, թե «Հայաստանի Էլեկտրական ցանցեր» ընկերության այն աշխատողները, ովքեր իրենց գործը թողած զբաղված են քաղաքական խարդավանքներով, հուլիսին կազատվեն աշխատանքից։
Հուլիսի 3-ին ԱԺ-ն 65 կողմ, 27 դեմ, 0 ձեռնպահ ձայներով երկրորդ ընթերցմամբ և ամբողջությամբ ընդունեց «Հանրային ծառայությունները կարգավորող մարմնի մասին» և «Էներգետիկայի մասին» օրենքներում նախատեսված փոփոխությունների և լրացումների փաթեթը (այլ կերպ ասած՝ ՀԷՑ-ի պետականացման նախագիծը)։