ԵՐԵՎԱՆ, 7 հուլիսի – Sputnik. Թեհրանը դատապարտում է Եմենին ու Լիբանանի տարածքին Իսրայելի հասցրած ավիահարվածները։ Այս մասին հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային։
«Իսմայիլ Բաղային վճռականորեն դատապարտել է Եմենի տարբեր շրջաններին, այդ թվում՝ Հոդեյդային, Ռաս Իսային, Սալիֆին և Ռաս էլ-Խատիբ էլեկտրակայանին Իսրայելի ռեժիմի հասցրած ավիահարվածները։ Իրանի ԱԳՆ ներկայացուցիչը Իսրայելի կողմից Եմենի տնտեսական և հասարակական ենթակառուցվածքներին, այդ թվում՝ օդանավակայաններին, նավահանգիստներին, էլեկտրակայաններին և արդյունաբերական պահեստներին հասցված բազմակի հարվածները որակել է որպես Եմենի ժողովրդի դեմ ուղղված աղաղակող հանցագործություն», – ասվում է Իրանի ԱԳՆ–ի Telegram ալիքում հրապարակված հաղորդագրության մեջ։
Իրանցի դիվանագետը կոչ է արել վերջ դնել ՄԱԿ-ի Անվտանգության խորհրդի անգործությանը՝ «ի պատասխան ռեժիմի կողմից Եմենի ժողովրդի դեմ ուղղված հանցագործությունների»։
Նա նշել է, որ Լիբանանի դեմ Իսրայելի շարունակվող հարձակումները հրադադարի, այդ պետության ազգային ինքնիշխանության ու տարածքային ամբողջականության, ինչպես նաև միջազգային իրավունքի հիմնարար սկզբունքների կոպիտ խախտում են: Այդ գրոհները, իրանցի դիվանագետի խոսքով, ուղղված են Լիբանանի քաղաքացիների անվտանգությանը։
Հուլիսի 6-ի երեկոյան Իսրայելը տասից ավելի ավիահարվածներ է հասցրել Եմենի արևմտյան հատվածում գտնվող թիրախներին, այդ թվում՝ Հոդեյդա քաղաքի նավահանգստին և երկրի այդ հատվածում գտնվող էլեկտրակայանին: Թել Ավիվի զինվորականները նախօրեին նաև հարվածներ են հասցրել Լիբանանում շիական «Հզբոլլահ» շարժման ռազմական օբյեկտներին: