Կա՛նգ առեք, այլապես կսկսենք խորհել անվանական բանադրանքի մասին. Հայր Ասողիկը` պաշտոնյաներին

ԵՐԵՎԱՆ, 3 հուլիսի – Sputnik. Մայր աթոռի թանգարանների ու արխիվների տնօրեն Հայր Ասողիկ քահանա Կարապետյանը դիմել է ՀՀ պաշտոնյաներին` զգոնության կոչ անելով։ Հայր Ասողիկը նրանց հերդորել է վերջ տալ եկեեցու դեմ արշավին, որի մեջ «իսպառ բացակայում է սերն ու լույսը, և կա միայն թշնամանք»։

Հայր Ասողիկը զգուշացրել է, որ եթե այս ամենը շարունակվի, Հայ առաքելական եկեղեցու սպասավորները հարկադրված են լինելու խորհելու անվանական բանադրանքի մասին, քանի որ պաշտոնյաներն արդեն հատում են հավատքի և հոգևոր կյանքի բոլոր սահմանները:

Նա հիշեցրել է նաև, որ քահանաները կամ եպիսկոպոսները իրավունք ունեն բանադրելու Սբ Եկեղեցու մոլորյալ ու հանցապարտ անդամներին՝ հոգևոր-բարոյական «զանազան հանցանքների կամ պատվիրազանցության համար»:

Հիշեցնենք` ՀՀ վարչապետ Նիկոլ Փաշինյանը մայիսի 29-ին կառավարության նիստի ժամանակ քննադատեց եկեղեցիների վիճակը՝ անվանելով դրանք «չուլանացված և աղբով լի»։ Հունիսի 2–ին նա հայտարարեց` եթե պարզվի, որ Գարեգին Բ–ն իսկապես խախտել է կուսակրոնության ուխտը և զավակ ունի, նա չի կարող լինել Ամենայն հայոց կաթողիկոս։ Նա գրեթե ամեն օր գրառումներ է անում սոցցանցում` պահանջելով, որ կաթողիկոսը հեռանա։

Հունիսի 24-ին էլ Փաշինյանը տարածեց իշխանական կայքի մի հրապարակում, ըստ որի` իբր ընդդիմադիրները պետական հեղաշրջում են նախաձեռնել։ Այդ «բացառիկ թղթերում» արծարծվում էր նաև Բագրատ սրբազանի անունը։

Հունիսի 25-ի լույս 26-ի գիշերը Բագրատ արքեպիսկոպոս Գալստանյանը 2 ամսով կալանավորվեց ու տեղափոխվեց ԱԱԾ շենքում գտնվող «Երևան-Կենտրոն» քրեակատարողական հիմնարկ։

Շիրակի թեմի առաջնորդ Միքայել արքեպիսկոպոս Աջապահյանի նկատմամբ էլ քրեական գործ հարուցվեց իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով։ Նա հունիսի 28–ին 2 ամսով կալանավորվեց։

Նշենք, որ այս ՔԿՀ–ում է գտնվում նաև գործարար Սամվել Կարապետյանը, որի նկատմամբ քքրեական հետապնդում սկսվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն։