ԵՐԵՎԱՆ, 1 հուլիսի – Sputnik․ «Դալմա մոլ» առևտրի կենտրոնի ճակատային հատվածից այսօր ապամոնտաժվել են «Ազատություն Սամվել Կարապետյանին» գրությամբ պաստառները, նաև նրա լուսանկարով պաստառը։
Նշենք, որ առևտրի կենտրոնը պատկանում է Սամվել Կարապետյանին։ Ավելի վաղ գործարարի նկարով պաստառներն ապամոնտաժվել էին «Տաշիր» առևտրի կենտրոնի ճակատից, ինչպես նաև Հյուսիսային պողոտայի «Տաշիր սթրիթի» հատվածից։
Երևանի քաղաքապետարանի աշխատակազմի առևտրի, ծառայությունների և գովազդի վարչության պետ Արմեն Առաքելյանը Sputnik Արմենիայի հետ զրույցում հայտնել էր, որ գովազդային վահանակն ինքնակամ է տեղադրված, այդ պատճառով էլ ապամոնտաժվում է համայնքի կողմից` առանց տնտեսվարողին տեղյակ պահելու։
Փաստաբան Վարդան Ալոյանն իր հերթին Sputnik Արմենիային ասել էր, որ քաղաքապետարանի և ոստիկանության աշխատակիցները վահանակն ապամոնտաժում են` հղում անելով «Գովազդի մասին» ՀՀ օրենքին, մինչդեռ տեղադրված վահանակը իրազեկման ցուցապաստառ էր, ոչ թե գովազդ։
Հիշեցնենք` Սամվել Կարապետյանի տանը հունիսի 17-ին խուզարկություն իրականացվեց այն բանից հետո, երբ նա հրապարակավ աջակցություն հայտնեց Հայ առաքելական եկեղեցուն՝ ընդգծելով, որ մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա:
Նրա հայտարարությունից հետո ՀՀ վարչապետ Նիկոլ Փաշինյանը գործարարին ուղղված վիրավորական և սպառնալի գրառումներ արեց սոցցանցերում։
Ավելի ուշ ՔԿ–ն հայտնեց, որ 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ:
Հունիսի 18-ին Սամվել Կարապետյանը 2 ամսով կալանավորվեց։ Այժմ նա «Երևան–Կենտրոն» ՔԿՀ–ում է։
ՀՀ վարչապետ Նիկոլ Փաշինյանը հունիսի 18–ին` գործարար, ՀԷՑ–ի սեփականատեր Սամվել Կարապետյանի կալանավորումից ժամեր առաջ, հայտարարեց` հասունացել է պահը, երբ «Հայաստանի էլեկտրական ցանցեր» ՓԲԸ–ն պետք է ազգայնացվի (պետականացվի)։ Փաշինյանը նաև սպառնաց ազատել ՀԷՑ-ի՝ պետության հետ չհամագործակցող աշխատակիցներին։ Հունիսի 24-ին նա հայտարարեց, որ ՀԷՑ–ի պետականացման պլանը պատրաստ է։