ԵՐԵՎԱՆ, 26 հունիսի - Sputnik. Իրանի միջուկային օբյեկտներին հարվածելու համար որպես տեղեկատվության աղբյուր օգտագործվող ՄԱԳԱՏԷ-ի ստուգման համակարգի նկատմամբ վստահությունը հարցականի տակ է, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
Զախարովայի խոսքով՝ փաստը, որ ՄԱԳԱՏԷ-ի վերահսկողության տակ գտնվող իրանական միջուկային օբյեկտները թիրախ են դարձել ամերիկյան և իսրայելական հրթիռների համար, բացահայտ մարտահրավեր է միջուկային զենքի չտարածման պայմանագրի համակարգին:
«Իրական խոչընդոտներ են առաջացել գործակալության և Իրանի միջև կնքված համապարփակ երաշխիքների մասին համաձայնագրի իրականացման համար։ Հարցականի տակ է վստահությունը գործակալության ստուգման գլոբալ համակարգի նկատմամբ, որն օգտագործվել է որպես ռմբակոծությունների պլանավորման համար տեղեկատվության աղբյուր», – ասել է նա ճեպազրույցի ժամանակ։
Ինչպես նշել է Զախարովան, հենց ԱՄՆ-ն և Իսրայելն են պատասխանատու ՄԱԳԱՏԷ-ի գործունեությանը հասցված հսկայական վնասի համար, որքան էլ նրանք փորձեն բոլոր մեղքերի մեջ մեղադրել Թեհրանին:
Հիշեցնենք` հունիսի 13-ին Իսրայելը լայնածավալ գործողություն սկսեց Իրանի դեմ՝ Թեհրանին մեղադրելով գաղտնի ռազմամիջուկային ծրագիր իրականացնելու մեջ, որն իբր մոտեցել է անդառնալի կետի: Օդային ռմբակոծությունների և դիվերսիոն խմբերի թիրախներ դարձան միջուկային օբյեկտները, զինված ուժերի հրամկազմը, միջուկային ֆիզիկոսները, ավիաբազաները, հակաօդային պաշտպանության միջոցները, «երկիր-երկիր» դասի հրթիռները:
Իրանը, որը հերքում է իր միջուկային ծրագրի ռազմական բաղադրիչը, պատասխանում էր հրթիռային համազարկերով և հարվածային անօդաչու թռչող սարքերի արձակմամբ:
Հունիսի 22-ի լույս գիշերը ԱՄՆ հարվածեց Նաթանզում, Ֆորդոյում և Սպահանում գտնվող երեք միջուկային օբյեկտներին։ Գրոհը, ըստ Վաշինգտոնի, նախատեսված էր Իրանի միջուկային ծրագիրը ոչնչացնելու կամ լրջորեն թուլացնելու համար։
ԱՄՆ նախագահ Դոնալդ Թրամփը հայտարարեց՝ Թեհրանը պետք է համաձայնի ավարտել այս պատերազմը, հակառակ դեպքում կբախվի շատ ավելի լուրջ հետևանքների։
Հունիսի 24-ի գիշերը Թրամփը հայտարարեց, որ Իսրայելն ու Իրանը համաձայնության են եկել հրադադարի շուրջ, որը 24 ժամ անց պետք է դառնա «12-օրյա պատերազմի պաշտոնական ավարտը», իսկ առավոտյան հայտնեց, որ Իրանի և Իսրայելի միջև հրադադարի ռեժիմը ուժի մեջ է մտել՝ խնդրելով չխախտել այն: