ԵՐԵՎԱՆ, 11 հունիսի - Sputnik. ՀՀ փոխվարչապետ Մհեր Գրիգորյանը Եվրասիական տնտեսական հանձնաժողովի մաքսային համագործակցության հարցերով նախարար Ռուսլան Դավիդովի հետ քննարկել է ԵԱՏՄ-ում մաքսային կարգավորման հարցերը: Այս մասին հայտնում են հանձնաժողովի մամուլի ծառայությունից։
Կողմերը քննարկել են մաքսային տարանցման միասնական համակարգի ներդրումը, սահմանների հատման դյուրացմանն ուղղված միջոցառումները և այդ մեխանիզմների հետագա կատարելագործման հեռանկարները: Ընդգծվել է միության տարածքում մաքսային վարչարարության միասնականության ապահովման համար կառուցողական փոխգործակցության կարևորությունը։
Բացի այդ, Ռուսլան Դավիդովն աշխատանքային հանդիպում է ունեցել Հայաստանի պետական եկամուտների կոմիտեի նախագահ Էդուարդ Հակոբյանի հետ: Բանակցությունների ընթացքում քննարկվել են մաքսային ոլորտում ժամանակակից տեխնոլոգիաների կիրառումը, տեղեկատվության փոխանակումը, մաքսային արժեքի հսկողությունը, նավիգացիոն կապարակնիքների կիրառմամբ տարանցման միասնական համակարգի մասին համաձայնագրի իրականացումը, ինչպես նաև հետագա աշխատանքի ծրագրերը:
Դավիդովը Հայաստանում է աշխատանքային այցով։