ԵՐԵՎԱՆ, 9 հունիսի – Sputnik․ ՀՀ կառավարությունում եկեղեցու կողմից հարկերի վճարման հետ կապված խնդիրների վերաբերյալ քննարկումներ չեն եղել։ Այսօր ԱԺ-ում լրագրողների հետ ճեպազրույցում ասաց ՀՀ պետական եկամուտների կոմիտեի նախագահ Էդուարդ Հակոբյանը։
Լրագրողները խնդրեցին մեկնաբանել, թե ինչու են իշխանությունները պարբերաբար խոսում եկեղեցու հարկ վճարելու մասին։ Հակոբյանը նշեց, որ ՊԵԿ նախագահի պաշտոնում իր ավելի քան կես տարվա ընթացքում այդ հարցով քննարկումներ չեն եղել:
«Եկեղեցու կողմից հարկերի վճարման հետ կապված հարցեր չկան, և ես չեմ լսել, որ այդպիսիք լինեն։ Ընդհանուր առմամբ մոտեցումը հետևյալն է` եթե եկեղեցին զբաղվում է առևտրային գործունեությամբ, ապա պետք է հարկեր վճարի այդ մասով, բայց ոչ կապված իր հիմնական գործունեության հետ»,- հայտարարեց Հակոբյանը։
Հարցին, թե արդյոք նա Հայ առաքելական եկեղեցու հետևորդ է, ՊԵԿ նախագահը դրական պատասխան տվեց:
Ըստ նրա՝ եթե վարչարարության արդյունքում ինչ-որ խնդիրներ հայտնաբերվեն, ապա կդիմեն եկեղեցուն ու կխնդրեն շտկել դրանք։
Հիշեցնենք` ՀՀ վարչապետ Նիկոլ Փաշինյանը մայիսի 29-ին կառավարության նիստի ժամանակ քննադատեց եկեղեցիների վիճակը՝ անվանելով դրանք «չուլանացված և աղբով լի»։ Հաջորդ օրը նա տգեղ բառապաշարով գրառումներ արեց Հայ առաքելական եկեղեցու և բարձրաստիճան հոգևորականների մասին։ Եկեղեցուն վերաբերող վիրավորական գրառումներ արեց նաև նրա կինը` Աննա Հակոբյանը։ Հունիսի 2–ին ՀՀ վարչապետը հայտարարեց` եթե պարզվի, որ Ամենայն հայոց կաթողիկոս Գարեգին Բ–ն իսկապես խախտել է կուսակրոնության ուխտը և զավակ ունի, նա չի կարող լինել Ամենայն հայոց կաթողիկոս։