ԵՐԵՎԱՆ, 26 մայիսի – Sputnik․ Կոտայքի մարզի Ծաղկաձոր քաղաքում մայիսի 24–ին կողաշրջված կվադրոցիկլը վարել է Կոտայքի մարզի բնակիչ 19–ամյա Ալիկ Առաքելյանը։ Տեղեկությունը հայտնում է shamshyan.com–ը։
Ավելի վաղ հայտնել էինք, որ մայիսի 24–ին` ժամը 11:20–ի սահմաններում, Ծաղկաձորում կվադրոցիկլ է վթարի ենթարկվել, կա 2 զոհ, 2 տուժած։ ՀՀ ՆԳՆ ոստիկանությունից նշել էին, որ վթարի զոհ են դարձել 2009 թվականին ծնված 2 աղջիկներ։
Կայքը նշում է, որ դեպքից կարճ ժամանակ անց կվադրոցիկլը վարած Առաքելյանը ինքնակամ ներկայացել է ոստիկանության Հրազդանի բաժին։
shamshyan.com–ը պարզել է նաև կողաշրջման հետևանքով տուժած անձանց անունները` Երևանի բնակիչներ 15–ամյա Վիկտորիա Մ․–ն, 15–ամյա Դիաննա Ա․–ն, 15–ամյա Ալեքսանդրա Ա․–ն և 15–ամյա Ալեքսանդրա Գ․–ն։ Հիվանդանոցում Ալեքսանդրա Ա․–ն և Ալեքսանդրա Գ․–ն, գիտակցության չգալով, մահացել են։
Կվադրոցիկլը տեղափոխվել է ոստիկանության Հրազդանի բաժնի պահպանվող հատուկ տարածք:
Հիշեցնենք, որ դեպքով քրեական վարույթ է նախաձեռնվել ՀՀ քրեական օրենսգրքի 342-րդ հոդվածի 4-րդ մասի հատկանիշներով։
Նշենք նաև, որ ՀՀ առողջապահության նախարարությունից այսօր հայտնել էին, որ կվադրոցիկլի վթարի արդյունքում տուժածներից մեկը դեռ հիվանդանոցում է, վիճակը կայուն է։ Վթարի հետևանքով մյուս տուժածը դուրս է գրվել հիվանդանոցից հենց վթարի օրը։