ԵՐԵՎԱՆ, 9 մայիսի – Sputnik․ Հայաստանը հետաքննություն է կատարել Ադրեջանի կողմից հայտարարվող հրադադարի ռեժիմի խախտումների վերաբերյալ և փոխանցել Ադրբեջանին։ Պարզվել է, որ ընդհանուր առմամբ` նման խախտումներ չկան։ Այսօր Հաղթանակի այգում լրագրողների հետ ճեպազրույցում ասաց ՀՀ Անվտանգության խորհրդի քարտուղար Արմեն Գրիգորյանը։
«Հայաստանը խնդրել է դիվանագիտական ճանապարհով տվյալներ տրամադրել հրադադարի խախտումների վերաբերյալ, որոնց մասին Ադրբեջանը հայտարարում է։ Դրանց մասին Հայաստանը հետաքննություն է կատարել և փոխանցել է Ադրբեջանին»,- ասաց Գրիգորյանը։
ՀՀ ԱԽ քարտուղարը հավելեց, որ Հայաստանն էլ տվյալներ է փոխանցել Ադրբեջանին այն խախտումների վերաբերյալ, որոնց մասին Հայաստանն է հայտարարում, և ակնկալում է մանրամասն հետաքննություն դրանց վերաբերյալ։
Լրագրողները նաև ԱԽ քարտուղարին խնդրեցին նշել, թե որն է իր՝ Հաղթանակի զբոսայգի այցելելու նպատակն ու օրվա ուղերձը։ Գրիգորյանը նշեց՝ եկել է հարգելու այն մարդկանց հիշատակը, ովքեր իրենց կյանքը տվեցին Երկրորդ համաշխարհային պատերազմում հաղթանակի համար։
Լրագրողներից մեկը նկատեց՝ նախկինում այս օրը նաև գալիս էին հարգելու Արցախյան պատերազմում և Շուշիի ազատագրման համար իրենց կյանքը նվիրաբերած հերոսների հիշատակը, հիմա ի՞նչ է փոխվել։
«Նաև իրենց հիշատակը հարգելու»,- ի պատասխան ասաց Գրիգորյանը։
«Ինչ-որ կաշկանդում կա՞, ինչու՞ չեք հայտարարում այդ մասին»,- հարց ուղղեց լրագրողը, որը, ըստ էության, անպատասխան մնաց։
Հիշեցնենք, որ արդեն ավելի քան մեկ ամիս է՝ պարբերաբար տեղեկություններ են ստացվում Սյունիքի մարզի Խոզնավար և Խնածախ գյուղերում լսվող կրակոցների վերաբերյալ։ Դրանք ուղեկցվում են Ադրբեջանի ՊՆ կողմից տարածվող ապատեղեկատվությամբ, թե հայկական կողմը խախտում է հրադադարի ռեժիմը։
Սյունիքի մարզից բացի պարբերաբար կրակոցներ են լսվում նաև Տավուշի մարզի Բերդի տարածաշրջանի սահմանային գյուղերում։ ՀՀ պաշտպանության նախարարությունը պարբերաբար հիշեցնում է, որ Հայաստանի Հանրապետության վարչապետի աշխատակազմն առաջարկել է հրադադարի ռեժիմի խախտման դեպքերի և այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին Ադրբեջանը մինչև օրս չի արձագանքել։