ԵՐԵՎԱՆ, 27 փետրվարի – Sputnik. Հայաստանում այսուհետ կրիպտոարժույթի առուվաճառքի ոլորտը կկարգավորվի։ Այս մասին համապատասխան որոշումն ընդունվեց ՀՀ կառավարության նիստի ժամանակ։
ՀՀ վարչապետ Նիկոլ Փաշինյանը հայտարարեց, որ մեր երկրում կրիպտոարժույթների ոլորտը կարգավորող առաջին նախագիծն է ընդունվում։
Վարչապետը սրտնեղել էր, որ ՀՀ պետական կառավարման համակարգը, որպես այդպիսին, գիտելիք չունի համակարգված կրիպտոարժույթների մասին, քանի որ այդ թեմային չեն առնչվում։
«Ինչքան էլ նկատելու չտանք, կրիպտոարժույթները գոյություն ունեն, և ոնց որ թե իրենց գոյությունը գնալով ավելի ու ավելի է նկատելի դառնում»,– հայտարարեց Փաշինյանը։
ՀՀ կենտրոնական բանկի նախագահ Մարտին Գալստյանն իր հերթին նշեց մի շարք կարգավորումներ, որոնք կգտնվեն ԿԲ վերահսկողության ներքո։
«Կրիպտոարժույթների թողարկողը երբ կրիպտոակտիվների վերաբերյալ հրապարակային առաջարկ է ներկայացնում, այդ դեպքում նա ԿԲ պետք է ներկայացնի առաջարկի փաստաթուղթ։ Դա ավելի թեթև տարբերակ է, քան այն, ինչ այսօր ներկայացնում են պարտատոմսեր թողարկողները։ Ծառայություններ մատուցողների համար սահմանվում են մուտքի պահանջներ, այսինքն` ԿԲ–ն պետք է տեսնի` ովքեր են ղեկավարները, նշանակալից սեփականատերերը, և կսահմանվեն կապիտալի նվազագույն սահմաններ։ Այսինքն, մարդուն առաջարկ անելիս բոլոր պայմանները պետք է պահվեն»,– հայտարարեց Գալստյանը։
Նիկոլ Փաշինյանը նշեց, որ աշխարհում նման երկիր չկա, որ տեխնոլոգիաները զարգանան առանց կարգավորումների։
«Էդ միայն մեր երկրում կարող է լինել, որ մայթով գնաս ու մեկ էլ տեսնես` մի արկղ է դրած, վրան կրիպտոարժույթ է գրված ու ասեն` կարո՞ղ է` առնես։ Դրա համար էլ կրիպտոարժույթը չի զարգանում։ Մարդիկ, եթե ուրիշ տեղ իմանան, որ մեր երկրի մայրաքաղաքում տեղեր կան` փողոցով քայլելով գնում ես, տեսնում ես մի պատուհան, նայում ես, ասում ես` կարո՞ղ է կրիպտոարժույթ ունենաք, հա՞, դե մի 4 հատ տվեք, կզարմանան։ Սա աբսուրդ է, որ տեխնոլոգիաների տանիքի ներքո ինչ–որ գործողություններ ենք անում։ Սա բացարձակապես անընդունելի է։ Դա անհամատեղելի է պետության հետ»,– բարկացավ Փաշինյանը։
Ըստ նրա` տեխնոլոգիական համայնքն ինքը պետք է գա, ասի կառավարությանը` կրիպտոակտիվների ոլորտի կարգավորման խնդիր կա, իսկ եթե չի ասում, ուրեմն մի բան կա։
«Այսինքն, ստացվում է` մենք պետք է պատահական իմանա՞նք, որ նման բան կա։ Ես, օրինակ, կյանքում չեմ առնչվել կրիպտոարժույթների հետ. դա իմ` տեխնոլոգիական ոչ ժամանակակից լինելու մասին է խոսում։ Իհարկե, դա լավ բան չէ»,– խոստովանեց վարչապետը։
ՊԵԿ նախագահ Էդուարդ Հակոբյանն ավելացրեց, որ իրենց ստուգողները երբ փորձում են այս ոլորտի հետ առնչվել, չեն հասկանում` ինչ անել։ Նրանք բախվում են մի իրավիճակի հետ, երբ տնտեսվարողը չի հասկանում` ինչպես այդ հարկը վճարել, և ստուգողն իր հերթին չի հասկանում` ինչպես հաշվարկել այդ հարկը։ Այս նախագիծը, ըստ նրա, ՊԵԿ–ի համար իրավիճակի կարգավորման հիմք կդառնա։
Հավելենք, որ առաջիկայում «Կրիպտոակտիվների մասին», «Անկանխիկ գործառնությունների մասին» օրենքներում լրացումներ կատարելու նախագիծը կներկայացվի Ազգային ժողովի քննարկմանը։