Ռուբեն Վարդանյանն ու նրա պաշտպանը միջնորդություն են ներկայացրել. դատարանը մերժել է

ԵՐԵՎԱՆ, 17 փետրվարի – Sputnik. Բաքվում կայացել է Արցախի նախկին պետնախարար Ռուբեն Վարդանյանի «գործով» հերթական «դատական նիստը»։ Ինչպես հայտնում են ադրբեջանական լրատվամիջոցները, Վարդանյանի պաշտպանը դատավորների կազմին բացարկ հայտնելու միջնորդություն են ներկայացրել։

Դատավորները որոշել են միջնորդությունը թողնել առանց քննության` պատճառաբանելով, թե կոնկրետ հիմքերը բացակայում են։

Ըստ ադրբեջանական ԶԼՄ–ների` նիստի սկզբում Ռուբեն Վարդանյանն ու նրա փաստաբան Աբրահամ Բերմանը դատարանին խնդրել են պայմաններ ստեղծել իրենց առանձին հանդիպման համար: Դատարանը բավարարել է միջնորդությունը և այդ նպատակով ընդմիջել նիստը։

Հիշեցնենք, որ հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին:

Ռուբեն Վարդանյանը փետրվարի 13–ին կայացած նիստում հայտնել է, որ հրաժարվում է պետության տրամադրած հանրային պաշտպան Ազեր Մագերամովի ծառայություններից, և իր շահերը պաշտպանելու է միայն պայմանագրային փաստաբան Աբրահամ Բերմանը։

Վարդանյանին մեղադրանք է ներկայացվել Ադրբեջանի քրեական օրենսգրքի 16 հոդվածով։ Մեղադրանքների թվում է «արտերկրում Ադրբեջանի դիվանագետների դեմ «Նեմեսիս-2» ահաբեկչական գործողություն նախաձեռնելը»։