Հրդեհ է բռնկվել ԱՄՆ Կոնտրա-Կոստա շրջանի Մարտինես քաղաքի (Կալիֆոռնիա նահանգ) նավթավերամշակման գործարանում, առնվազն 6 մարդ է տուժել։ Այս մասին հայտնում է CBS հեռուստաալիքը՝ հղում անելով տեղի առողջապահական մարմիններին:
Նշվում է, որ միջադեպը տեղի է ունեցել Martinez Refining Company ընկերության գործարանում։ Վեց տուժածներից չորսին հիվանդանոց տեղափոխելու կարիք է եղել։
«Խնդրում եմ, մտեք սենյակ, փակեք բոլոր պատուհաններն ու դռները, անջատեք բոլոր ջեռուցիչները, օդորակիչները և օդափոխիչները։ Եթե բուխարին չեք օգտագործում, փակեք ծխի փակիչներն ու օդափոխման անցքերը, դռների և պատուհանների ճեղքերը փակեք կպչուն ժապավենով կամ խոնավ սրբիչներով»,- մոտակա շրջանների բնակիչներին առողջապահական մարմինների խորհուրդներն է մեջբերում հեռուստաալիքը տեղի:
Հիշեցնենք, որ հունվարի կեսերին հրդեհ էր բռնկվել ԱՄՆ Կալիֆոռնիա նահանգի Մոս Լենդինգ քաղաքի խոշոր էլեկտրակայանում։ Մոտակա մի շարք շրջաններում տարհանում էր հայտարարվել: