ԵՐԵՎԱՆ, 27 հունվարի – Sputnik. Բաքվի դատարանը հրաժարվել է Արցախի նախկին ղեկավարներին տնային կալանքի ենթարկել։ Տեղեկությունը հայտնում են ադրբեջանական ԶԼՄ–ները։
Այսօր Բաքվի դատարանում շարունակվել է Արցախի նախկին ռազմաքաղաքական ղեկավարության դատավարությունը։ Նախորդ նիստի ժամանակ նրանք, բացի Արայիկ Հարությունյանից, դիմել էին դատարանին՝ տնային կալանքի տեղափոխելու միջնորդությամբ։
Դատավոր Զեյնալ Աղաևը մերժել է այդ միջնորդությունները։
Հիշեցնենք, որ հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով դատավարությունը: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին, դատարանը որոշել է 422 հատորներից 400-ը դիտարկել առանձին: